Беларусь загаціла Расею адыгейскага сырам

Гэта адбылося пасля таго, як Адыгея яго запатэнтавала.

У верасні 2017 года ў Расеі ўвайшлі ў дзеянне дакументы, згодна з якімі адыгейскі сыр можа вырабляцца толькі на тэрыторыі Адыгеі. У выніку вытворчасць у РФ гэтай прадукцыі ўпала на 15%, а вызваленую нішу занялі заводы з Казахстана і Беларусі, піша «Коммерсант».

Канфлікт паміж вытворцамі адыгейскага сыру і іх калегамі з іншых рэгіёнаў паўстаў у 2016 годзе, калі назва «адыгейскі сыр» была замацаваная «Распатэнтам» як найменне месца паходжання тавару. У верасні 2017 года ўвайшла ў дзеянне пастанова суда аб інтэлектуальных правах, якая пацвердзіла выключнае права прадпрыемстваў, якія знаходзяцца на тэрыторыі Адыгеі (рэспубліканскі звяз вытворцаў сыру, аб'ядноўвае сем малочных заводаў) на назву «адыгейскі сыр». Суд пагадзіўся з довадамі сыраробаў Адыгеі аб тым, што прадукт, тэхналогія якога была распрацаваная на аснове нацыянальнай кухні адыгаў, мае ўнікальныя ўласцівасці, абумоўленыя якасцю малака (быдла пасецца ў перадгор'ях Каўказа), а таксама адмысловымі прыёмамі працы (выкарыстанне вярбовых кошыкаў для фармавання сыру) і навыкамі супрацоўнікаў прадпрыемстваў. Вытворцы з іншых рэгіёнаў беспаспяхова спрабавалі абскардзіць забарону выкарыстання назвы ў Вярхоўным судзе.

Пасля гэтага вытворчасць адыгейскага сыру на прадпрыемствах за межамі рэспублікі была спыненая, у выніку чаго, са звестак кампаніі AC Nielsen, сегмент адыгейскага сыру ў 2017 годзе скараціўся на 15,2% (адыгейскі сыр займае блізу 10% расейскага рынку мяккіх сыроў). Паводле прагнозу іншых рэгіянальных вытворцаў сыру, кошт прадукту будзе расці, а аб'ём вытворчасці ў Расеі - скарачацца.

У расейскіх сетках тавар актыўна замяшчаецца прадукцыяй з Казахстана і Беларусі, бо вытворцы ў гэтых краінах не абавязаныя выконваць выключныя правы, замацаваныя «Распатэнтам», піша «Коммерсант».

Нядаўна група малакаперапрацоўчых прадпрыемстваў з некалькіх рэгіёнаў Расеі звярнулася ў ФАС, «Распатэнт» і Мінсельгас РФ са скаргай на нядобрасумленную канкурэнцыю з боку прадпрыемстваў, якія ўваходзяць у Саюз вытворцаў прадукцыі «Сыр адыгейскі» (Рэспубліка Адыгея). Яны маюць намер даказаць, што патрабаванні да адыгейскага сыру, зафіксаваныя ў патэнце, не выконваюцца ў самой Адыгеі.

У Беларусі адыгейскі сыр вырабляюць Лідскі малочна-кансервавы камбінат, Кобрынскі масларобна-сыраробны завод, магілёўская «Бабуліна крынка», Калінкавіцкі малочны камбінат ды іншыя.