Дырэктар пра скарачэнне працоўнага дня да 1 гадзіны: А ў чым трагедыя?

Нахабства дырэктара «Строммашына» ўражвае.

«У чым трагедыя? Гэта што, не ў рамках працоўнага заканадаўства? Адкрыйце пачытайце Працоўны кодэкс. Калі ў маіх дзеяннях ёсць яго парушэнні, то з мяне пытайце. А калі не, то гэта ўнутраная справа прадпрыемства», - абураецца пытанню Еўрарадыё кіраўнік «Строммашына» Сяргей Грынкевіч.

Заводу «Строммашына» нядаўна быў працягнуты тэрмін санацыі на пяць гадоў, да 2023. Гэта значыць, не варта быць аптымістычным, чакаючы хуткага пагашэння даўгоў і стабільнага прыбытковага існавання вытворчасці.

«Прадпрыемства знаходзіцца ў стане санацыі. Я знаходжуся на пасадзе кіраўніка ўсяго другі месяц. Мы пачынаем весці працу ў памяншэнні дадатковых выдаткаў, якія цягнуць штомесячныя выдаткі, - тлумачыць кіраўнік. - У рамках гэтага праходзіць аптымізацыя. І некаторых людзей мы часова, праз тое, што яны не задзейнічаны ў вытворчасці, адпраўляем на невялікі, кароткачасовы тэрмін, пакуль яны не будуць прыцягнутыя да асноўнай працы прадпрыемства».

Сяргей Грынкевіч прызнае, што пакуль няма магчымасці плаціць заробак усім. Тым больш тым, хто цяпер не задзейнічаны ў вытворчасці:

«Таму было вырашана прыняць гэтыя меры. Тым больш, для іх няма працы. Мы не можам плаціць грошы проста за іх прыход на працоўнае месца. Можа, яны змогуць дзесьці падзарабляць, знайсці сабе грошы».

У аддзеле кадраў «Строммашына» патлумачылі, што такія змены яшчэ не прынятыя. А нават калі і будуць, то закрануць пенсіянераў, якія дагэтуль працуюць на прадпрыемстве, і будучых пенсіянераў, у якіх заканчваюцца кантракты ў снежні. Гэта блізу 30-40 чалавек.

Цяпер на вытворчасці працуюць блізу 1300 чалавек.

«Заробкі супрацоўнікаў, якія трапілі пад змены, будуць лічыцца, грунтуючыся на стаўцы і колькасці адпрацаваных гадзін, і, адпаведна гэтаму, будзе прапарцыйна налічвацца рабочым», - тлумачыць супрацоўнік аддзела кадраў ААТ «Строммашына».