У Расеі пасля жорсткай пасадкі загарэўся вайсковы гелікаптэр Мі-8

Інцыдэнт адбыўся ў Чэлябінскай вобласці.

Вайсковы верталёт Мі-8 здзейсніў жорсткую пасадку на аэрадроме Упрун у Чэлябінскай вобласці, пасля чаго загарэўся, паведамляе РБК са спасылкай на Мінабароны.

«Пасля выканання планавага палёту гелікаптэр Мі-8 здзейсніў жорсткую пасадку і загарэўся. Экіпаж у складзе трох чалавек самастойна пакінуў борт. Жыццю і здароўю чальцоў экіпажа нічога не пагражае», - гаворыцца ў паведамленні Мінабароны (цытата з «Інтэрфакса»).

У вайсковым міністэрстве растлумачылі, што пажарныя паспелі патушыць узгаранне на борце. Прычынай інцыдэнту, паводле папярэдніх звестак, магла стаць тэхнічная няспраўнасць.

Цяпер на месцы здарэння працуе дасланая камандаваннем Цэнтральнай вайсковай акругі камісія.