Куды паехаць увосень: найлепшыя выставы Еўропы

Дзеля гэтага варта набыць квіток на самалёт.

У аглядзе vokrugsveta.ua - самыя ўражлівыя мастацкія падзеі восеньскага сезона 2018, дзеля якіх варта набыць квіток на самалёт.

Мабыць, найбольш важная выстава восені пройдзе ў Вене. Венскі Музей гісторыі мастацтваў прадэманструе грандыёзную рэтраспектыву Піцера Брэйгеля-старэйшага. Мяркуючы з усяго, гэта будзе найбуйнейшая выстава гэтага вялікага нідэрландскага мастака за ўсю гісторыю чалавецтва: абяцаюць сабраць разам прыблізна трыццаць ягоных карцін, гэта значыць, прыкладна тры чвэрці ўсяго, што захавалася да нашых дзён.

Сярод іншага, «Трыумф смерці» з музея Прада і «Звар’яцелая Грэта» з Антверпену.

Але ў Вену гэтай восенню мае сэнс ехаць не толькі дзеля Брэйгеля. Амаль адначасова Альберціна прадэманструе вялікія выставы знакамітага грузінскага мастака Ніко Пірасмані і аднаго з заснавальнікаў імпрэсіянізму Клода Манэ. У Музеі Леапольда ўжо адкрыліся выставы Эгана Шыле і Густава Клімта, прысвечаныя стагоддзю з дня смерці двух галоўных аўстрыйскіх мастакоў. Бельведэр таксама запланаваў на восень сваю выставу Эгана Шыле.

У Парыжы гэтай восенню пройдуць адразу некалькі першакласных выстаў. Музей Люксембург прадставіць выставу плакатаў знакамітага чэшскага мастака Альфонса Мухі.

Гран-Пале пакажа вялікую рэтраспектыву выдатнага гішпанскага мастака Жаана Міро. Фонд Луі Вітана рыхтуе выставу амерыканскага мастака Жана-Мішэля Баскіі, працы якога цяпер б'юць рэкорды на аўкцыёнах. Адначасова там жа адкрыецца выстава выдатнага аўстрыйскага мастака Эгана Шыле (гэта значыць, гэтай восенню ў еўрапейскіх музеях пройдуць адразу тры выставы Шыле - дзве ў Вене і адна ў Парыжы).

Парыжскі Музей Жакмар-Андрэ запланаваў на восень выставу Караваджа, на якой збяруць разам адразу дзевяць работ вялікага італійца. Для мастака такога маштабу гэта вельмі шмат. Музей Арсэ пакажа працы Пабла Пікасо блакітнага і ружовага перыяду. Цэнтр Пампіду прэзентуе восенню вялікую выставу, прысвечаную кубізму.

У Венецыі восенню святкуюць 500-годдзе Тынтарэта. З нагоды юбілею аднаго з найвялікшых венецыянскіх жывапісцаў у ягоным родным горадзе сабралі практычна ўсе ключавыя шэдэўры майстры з розных музеяў свету. Маштабная выстава праходзіць адразу на дзвюх пляцоўках.

«Выкраданне Алены», Тынтарэта, фота: Getty Images.

Галерэя Акадэміі паказвае раннія працы, а ў Палацы дожаў дэманструюцца найлепшыя палотны сталага Тынтарэта, у тым ліку такія шэдэўры як «Выкраданне Алены» з мадрыдскага Прада або «Сусанна і старцы» са збору венскага Музея гісторыі мастацтваў.

Нарэшце, калі ў вас запланаваная паездка ў Нямеччыну, звярніце ўвагу на наступныя выставы. Штэдэлеўскі музей у Франкфурце-на-Майне прадэманструе гэтай восенню рэтраспектыву выбітнага вугорскага мастака і заснавальніка оп-арта Віктара Вазарэлі. Старая Пінакатэка ў Мюнхене рыхтуе вялікую выставу фларэнтыйскіх мастакоў эпохі Адраджэння, ад Джота да Леанарда да Вінчы. Нарэшце, у берлінскім выставачным цэнтры Марцін-Гропіус-Баў гэтай восенню пройдзе вялікая выстава, прысвечаная нямецкай археалогіі. Галоўным экспанатам выставы стане знакамітая палеалітычная статуэтка Венеры з Холе-Фельс, якая сёння ўважаецца за самую старую скульптуру ў гісторыі чалавецтва.

Усе пералічаныя выставы спісам:

Вена: Эган Шыле, Музей Леапольда, да 2018.11.04. Густаў Клімт, Музей Леапольда, да 2018.11.04. Клод Манэ, Альберціна, 2018.09.21 – 2019.01.06. Пітэр Брэйгель-старэйшы, Музей гісторыі мастацтваў, 2018.10.02 – 2019.01.13. Эган Шыле, Бельведэр, 2018.10.19 - 17.02.2019. Ніка Пірасмані, Альберціна, 2018.10.26 – 2019.01.27

Парыж: Альфонс Муха, Музей Люксембург, 2018.09.12 – 2019.01.27. Пабла Пікаса блакітнага і ружовага перыяду, Музей Арсэ, 2018.09.18 – 2019.01.06. Караваджа, Музей Жакмар-Андрэ, 2018.09.21 – 2019.01.28. Жан-Мішэль Баскія, Фонд Луі Вітан, 2018.10.03 – 2019.01.14. Эган Шыле, Фонд Луі Вітан, 2018.10.03 – 2019.01.14. Жаан Міро, Гран-Пале, 2018.10.03 – 2019.02.04. Кубізм, Цэнтр Пампіду, 2018.10.17 – 2019.02.25.

Венецыя: Тынтарэта, Палац дожаў і Галерэя Акадэміі, 2018.09.07 – 2019.01.06

Франкфурт-на-Майне: Віктар Вазарэлі, 2018.09.26 – 2019.01.13

Мюнхен: Фларэнцыя і яе мастакі, Старая Пінакатэка, 2018.10.18 – 2019.01.27

Берлін: Нямецкая археалогія, Марцін-Гропіус-Баў, 2018.09.21 – 2019.01.06