На Берлінскім марафоне перасягнуты сусветны рэкорд
1- 16.09.2018, 15:23
- 9,006
Кенійскі лёгкаатлет Эліуд Кіпчогэ перасягнуў дасягненне свайго суайчынніка.
Кеніец Эліуд Кіпчогэ ўстанавіў чарговы сусветны рэкорд на марафоне ў Берліне 16 верасня. 33-гадовы лёгкаатлет пераадолеў 42,195 кіламетра за 2 гадзіны, 1 хвіліну і 39 секунд, паведамляе dw.com.
Сваім вынікам Кіпчогэ на 1 хвіліну 18 секунд перасягнуў папярэдні сусветны рэкорд, таксама пастаўлены ягоным суайчыннікам Дэнісам Кімета на марафоне ў Берліне ў 2014 годзе.
Найлепшы вынік сярод жанчын паказала кенійка Глэдзіс Чэрона, якая прабегла традыцыйную для марафону дыстанцыю за 2 гадзіны, 18 хвілін і 11 секунд і перамагла на Берлінскім марафоне трэцім разам запар.
Эліуд Кіпчогэ ўдзельнічае ў марафонах цягам многіх гадоў. Кенійскі бягун здабыў залаты медаль на марафоне на Алімпійскіх гульнях у Рыа-дэ-Жанэйра ў 2016 годзе, праз год у красавіку ён стаў пераможцам марафону ў Лондане.
У траўні 2017 года падчас удзелу ў рэкламнай кампаніі Nike Кіпчогэ прабег марафон за 2 гадзіны 25 секунд, аднак гэты рэкорд афіцыйна не быў залічаны.