Дырэктар прадпрыемства раскрадаў інавацыйны фонд Менгарвыканкама?
12- 18.09.2018, 14:37
- 15,107
КДК устанавіў факт крадзяжу $3,5 мільёна.
У дачыненні да дырэктара унітарнага прадпрыемства ў Менску распачатая крымінальная справа аб буйным крадзяжы з інавацыйнага фонду гарвыканкама. Пад канкрэтны праект было выдадзена 7 мільёнаў рублёў, але ён не выкананы, распавялі tut.by ў Камітэце дзяржкантролю.
Фінансавая міліцыя праверыла, на што пайшлі грошы, выдадзеныя на падставе Дзяржаўнай праграмы інавацыйнага развіцця на 2011-2015 гады.
Выявілася, унітарнае прадпрыемства ў 2013-2016 гадах атрымала з інавацыйнага фонду Менгарвыканкама больш за 7 мільёнаў рублёў (3,5 мільёна даляраў. - Заўвага.). Грошы ішлі на распрацоўку доследнага ўзору шматмеснай гіпабаракамеры шматмэтавага выкарыстання. Але дагэтуль узор баракамеры не выраблены. Некаторыя закупленыя для гэтага тавары, работы і паслугі не выкарыстоўваліся, а асобныя працы фірма не выканала зусім.
Сродкі выдаткоўваліся з выкарыстаннем рэквізітаў некалькіх арганізацый, якія не мелі «дастатковага вытворчага і навуковага патэнцыялу» ў гэтай галіне, таксама грошы пералічваліся на рахункі фізічных асоб.
«Дакладна вядома, што прадстаўленыя ў органы казначэйства дакументы не адпавядалі рэчаіснасці, а выдадзеныя з інавацыйнага фонду Менгарвыканкама бюджэтныя сродкі выкарыстаныя на мэты, не звязаныя з распрацоўкай і вырабам доследнага ўзору баракамеры», - распавёў намеснік начальніка Дэпартамента фінансавых расследаванняў КДК Юрый Кардымон.
Паводле версіі следства, у 2013-2015 гадах на падставе дакументаў аб выкананні навукова-даследчых і доследна-канструктарскіх работ больш за 100 тысяч рублёў былі пералічаныя на рахункі фізічных асоб. Але, мяркуюць у КДК, ніякія працы не выконваліся, а грошы ішлі дырэктару, якія ён марнаваў на «ўласнае меркаванне».
У дачыненні да кіраўніка распачатая крымінальная справа на падставе ч.4 арт.210 КК (Крадзеж шляхам злоўжывання службовымі паўнамоцтвамі). Дырэктар прызнаны падазраваным, ён знаходзіцца пад вартай.
Высветлілася таксама, што за кошт фонду яшчэ ў 2016 годзе быў набыты рабатызаваны зварачны комплекс за 6 мільёнаў рублёў для вырабу баракамеры. Цягам месяца яго вывезлі ў Расею і не вярнулі дагэтуль, тут ён нават не выкарыстоўваўся.
Расследаванне крымінальнай справы прадаўжаецца.