Авіяэкспэрты: Рагозін і Усціменка - далакопы расейскай касманаўтыкі

Самастойных задач для расейскіх касманаўтаў у космасе няма.

Кіраўнік "Раскосмасу" Дзмітрый Рагозін і кіраўнік ягонай прэс-службы Уладзімір Усціменка ўвойдуць у гісторыю як далакопы расейскай касманаўтыкі, заявіў расейскі авіяэкспэрт Вадзім Лукашэвіч у Facebook, паведамляе "Гордон".

Авіяэкспэрт адзначыў, што Рагозіну і прэс-службе "Раскосмаса" не даруюць абвінавачванняў на адрас амерыканскіх касманаўтаў, якія нібыта маглі прасвідраваць у космасе карабель "Саюз".

"Праз гэтых вырадкаў нас выкінуць з наступнай вялікай міжнароднай праграмы стварэння пілатаванай калямесячнай станцыі... Адмова ад удзелу ў гэтым новым праекце - гэта пачатак агоніі расейскай пілатаванай касманаўтыкі", - падкрэсліў ён.

На думку Лукашэвіча, сур'ёзных задач для далейшага знаходжання чалавека на калязямной арбіце не засталося.

"Усё, што можна там зрабіць, даследаваць або вывучыць, уключаючы праблемы забеспячэння працяглага знаходжання чалавека ў бязважкасці, - ужо выканана за амаль 50-гадовую гісторыю калязямных заселеных станцый. І задач, якія нельга было б зрабіць прасцей і танней аўтаматамі на калязямной арбіце, для чалавека не засталося... Больш за тое, расейская (не блытаць з савецкай!) кіраваная касманаўтыка існуе дагэтуль менавіта дзякуючы міжнароднаму супрацоўніцтву, і найперш - з амерыканцамі", - заявіў экспэрт.

Ён адзначыў, што самастойных задач для расейскіх касманаўтаў у космасе няма, таму былы кіраўнік "Раскосмаса" яшчэ некалькі гадоў таму прапаноўваў адмовіцца ад сталай прысутнасці людзей у космасе.

"Пілатаваная касманаўтыка "з'ядае" прыкладна 40-45% усяго касмічнага бюджэту, нічога карыснага (у супастаўным памеры) не даючы наўзамен. У сучасных эканамічных умовах адмова ад міжнароднага супрацоўніцтва - гэта смерць. Спадзяванне на БРІКС - самападман... Праз некалькі гадоў тэхналагічныя перадавыя зробяць наступны лагічны крок - сыдуць да Месяца. Мы застанемся ў с…цы, бо рэалізаваць самастойна такі праект калямесячнага паселішча - гэта "вуха ад селядца", нам гэта проста не пад сілу, хто б што ні казаў, не прапаноўваў і не рысаваў на паперы", - падсумаваў Лукашэвіч.