У Грэцыі студэнты і школьнікі падтрымалі настаўнікаў-страйкоўцаў
1- 18.01.2019, 15:29
- 8,806
Яны правялі акцыю салідарнасці з педагогамі.
У Афінах у сутыкненні з паліцыяй перарасла акцыя салідарнасці школьнікаў і студэнтаў з педагогамі, якія страйкуюць праз планы ўладаў увесці новую сістэму найму дзяржаўных службоўцаў.
Пра гэта піша Reuters (пераклад - «Европейская правда»).
Ля грэцкага парламента 17 студзеня сабраліся блізу 3 тысяч пратэстоўцаў. Частка з іх паспрабавала прарваць паліцэйскі кардон, а сілавікі адказалі слезацечным газам.
Левы ўрад Грэцыі паабяцаў наняць на поўную стаўку 15 тысяч настаўнікаў цягам наступных трох гадоў, пачынаючы з гэтай восені.
Аднак прафзвязы сцвярджаюць, што прапанаваная сістэма найму несправядлівая да настаўнікаў дзяржаўных школ, якія гадамі працуюць паводле кароткатэрміновых кантрактаў. Прафзвязы таксама патрабуюць наняць больш педагогаў.
Цягам апошняга тыдня ў Афінах выкладчыкі правялі два пратэсты праз планы ўрада па найму, якія былі азмрочаныя сутыкненнямі паміж некаторымі дэманстрантамі і паліцыяй.