Самыя таленавітыя грамадзяне Расеі кінуліся на ўцёкі

Падведзены адзін з галоўных вынікаў пуцінскага кіравання.

У апошнія гады эміграцыя з Расеі набыла велізарныя маштабы. Пра гэта сведчыць як афіцыйная статыстыка, так і звесткі незалежных экспэртаў, прычым, рэальныя вынікі кіравання Пуціна такія, што колькасць уцекачоў з краіны ў 6 разоў большая, чым лічбы, прыводныя Расстатам, піша rusmonitor.com.

Так, з моманту вяртання Пуціна на пасаду прэзідэнта ў 2012-м годзе і да заканчэння тэрміну ягонай трэцяй кадэнцыі, паводле афіцыйных звестак, тэрыторыю РФ пакінула 1,7 млн чалавек. Гэта звесткі Расстата, аднак яны, як піша профільны тэлеграм-канал «Праект» у рамках правядзення свайго даследавання, значна заніжаныя, рэальная ж колькасць мігрантаў за згаданы вышэй перыяд у шэсць разоў большая. Так, Расстат сцвярджае, што ў Нямеччыну з РФ выехала ўсяго 5 тысяч чалавек, тады як нямецкі бок прыводзіць лічбу 25 тысяч чалавек! Паводле звестак ЗША, у 2017-м годзе на ПМЖ у Злучаныя Штаты прыбыло амаль 9300 расейцаў, тады як Расстат налічыў у гэтай краіне ўсяго 1400 мігрантаў з РФ. Больш за ўсё, паказваецца ў крыніцы, розняцца звесткі ў колькасці тых, хто выехаў у Чэхію і Вугоршчыну - ад афіцыйных рэальныя лічбы адрозніваюцца ў 12 і ў 14 разоў адпаведна.

Паводле інфармацыі крыніцы, толькі ў 2017-м годзе з Расеі выехала ўдвая больш людзей, чым у 2012-м, калі Пуцін змяніў Мядзведзева на пасадзе кіраўніка Крамля.

У краіны далёкага замежжа штогод выязджае ад 100 да 120-ці тысяч расейскіх грамадзян, а ўсяго ў перыяд з 2012-га да 2017-а з Расеі выехала больш за 10 млн чалавек. Такая колькасць мігрантаў паставіла нашу краіну на трэцяе месца ў свеце з пункту гледжання страт насельніцтва. Прычым, адзначаецца ў крыніцы, губляе Расея і вельмі забяспечаных людзей - за справаздачны 2017-ы год з РФ эмігравалі 3 тысячы даляравых мільянераў, і перасяляліся яны пераважна ў Злучаныя Штаты, на Кіпр і ў Вялікую Брытанію. Прычынай для пераезду гэтая катэгорыя эмігрантаў паказвае адсутнасць у Расеі ўмоў для вядзення бізнэсу і палітыка дзейнай улады, якая змушае бегчы самых ініцыятыўных.

Асобнай увагі заслугоўвае той факт, што пераважная большасць расейскіх эмігрантаў - гэта адукаваныя, высокаінтэлектуальныя людзі. «Уцечка мазгоў» з Расеі набыла каласальныя маштабы. За 2017-ы год з краіны выехала амаль 59 тысяч чалавек з вышэйшай адукацыяй і 430 уладальнікаў вучоных ступеняў. Калі ў 2012-м годзе доля адукаваных эмігрантаў ад агульнай колькасці тых, хто выехаў з краіны складала 17 адсоткаў, то цяпер яна складае 22 адсоткі.

Замест вучонай эліты, адукаваных і заможных расейцаў, якія збеглі з краіны за гады кіравання Пуціна, у РФ уехала больш за 15-ці млн мігрантаў з цэнтральнай Азіі. Большасць з гэтых людзей практычна не ведае расейскай мовы, аб наяўнасці ў іх адукацыі і гаворка не ідзе. Вось такая своеасаблівая замена насельніцтва з'яўляецца вынікам кіравання Пуціна.

Істотна адрозніваюцца ад рэальных і афіцыйныя звесткі аб матывах пераезду ў іншую краіну. Расстат сцвярджае, што часцей за ўсё людзі выязджаюць з Расеі з асабістых альбо сямейных прычын, а тых, хто бяжыць праз абвастрэнне крымінагеннай абстаноўкі, нізкага ўзроўню жыцця і эканамічнай нестабільнасці, нібыта зусім няшмат. Напраўду, піша «Праект», спасылаючыся на вынікі апытанняў, праведзеных спецыялістамі «Левада-цэнтра», 42 адсоткі эмігрантаў выехалі за мяжу ў пошуках лепшага жыцця, 41 адсотак - праз нестабільную эканамічную сітуацыю на Радзіме, а на трэцім месцы ў папулярнасці прычын для выезду значыцца жаданне забяспечыць дзецям лепшую будучыню, на якую, на думку рэспандэнтаў, тут няма ніякай надзеі.