CNN: Пампэа разважае над ідэяй балатавацца ў Сэнат ЗША
1- 21.01.2019, 11:16
- 6,031
Да гэтай пастановы яго можа падштурхоўваць лідар рэспубліканскай большасці ў Сэнаце Мітч Маконэл.
Дзяржсакратар ЗША Майк Пампэа разглядае магчымасць балатавацца на пасаду сэнатара ад штата Канзас у 2020 годзе. Пра гэта паведамляе тэлеканал CNN, піша «Гордан».
Са звестак суразмоўцы тэлеканала, Пампэа 20 студзеня сустрэўся з вядучым кансультантам Рэспубліканскай партыі Уордам Бэйкерам, з якім абмеркаваў сваё жаданне.
CNN адзначае, што Пампэа «засяроджаны на сваёй працы», аднак прыслухоўваецца да заклікаў балатавацца ў сэнатары. Адным з тых, хто падштурхоўвае дзяржсакратара да гэтага кроку, нібыта з'яўляецца лідар рэспубліканскай большасці ў Сэнаце Мітч Маконэл.
Да прызначэння на пасаду дырэктара ЦРУ, а затым дзяржсакратара Пампэа тры тэрміны быў чальцом Палаты прадстаўнікоў Кангрэса ад Канзаса.