Колькі зарабляюць бюджэтнікі ў суседніх з Беларуссю краінах

Самыя вялікія заробкі ў бюджэтнай сферы - у Польшчы.

Myfin.by паглядзеў, колькі зарабляюць работнікі бюджэтнай сферы ў краінах-суседках Беларусі.

Польшча: лекары атрымліваюць па 4 078 рублёў у эквіваленце

Сярэдні заробак у Польшчы ў снежні 2018 года склаў 5 274,95 злотых (3 010 беларускіх рублёў). Гэта на 6,1% больш, чым год таму.

Бюджэтнікі атрымліваюць менш - сярэдні заробак выкладчыка-стажора складае 2 900,20 злотых (1 654 рублі), кантрактнай настаўніцы – 3 219,22 (1 836 рублёў), прызначанага настаўніка – 4 176,30 (2 382 рублі), сертыфікаванага настаўніка – 5 336,40 злотых (1837 рублёў).

Выкладчыкі вышэйшых устаноў адукацыі зарабляюць у сярэднім 6 266,65 злотых (3 575 рублёў), лекары ў дзяржаўным сектары – 7 153,80 злотых (4 078 рублёў).

Хоць для беларусаў гэтыя заробкі здаюцца казачнымі, польскія бюджэтнікі некалькі гадоў дамагаліся павелічэння ставак, ладзячы страйкі.

У выніку спачатку ўрад абвясціў аб падвышэнні заробкаў настаўнікам (у тры этапы, першы ўжо рэалізаваны ў красавіку 2018 года), 8 чэрвеня Сэйм прыняў закон аб падвышэнні мінімальнага заробку работнікам аховы здароўя.

Літва: выхавальнікі атрымліваюць ад 1 629 рублёў у эквіваленце

Заробкі бюджэтнікаў, якія дамагаліся гэтага некалькі гадоў, павялічыліся і ў Літве. Да гэтага прывёў масавы страйк настаўнікаў, які закончыўся адстаўкай міністра адукацыі і павелічэннем тарыфаў прыкладна на 10%. Гэтыя змены дазволілі павялічыць заробак бюджэтнікаў на 60-90 еўраў за месяц.

З афіцыйных звестак Дэпартамента статыстыкі, сярэдні заробак у Літве ў трэцім квартале 2018 года складаў 935,7 еўра на месяц (2 292 рублі). Літоўцы, якія працуюць у сферы аховы здароўя і сацыяльнай работы, атрымлівалі ў сярэднім 856 еўраў (2097 рублёў), работнікі адукацыі - 765 еўраў (1874 рублі), з іх настаўнікі - 817 еўраў (2002 рублі), выхавальнікі - 665 еўраў (1 629 рублёў).

Латвія: у сферы адукацыі атрымліваюць па 1 950 рублёў у эквіваленце

З афіцыйных звестак латвійскага Цэнтральнага статыстычнага бюро, сярэдні заробак у Латвіі ў 2018 годзе складае 985 еўраў (2 413 рублёў) за месяц да выплаты падаткаў, якія дыферэнцыяваныя і прыкметна вышэйшыя за літоўскія (15%).

Латышы, якія працуюць у сферы адукацыі, атрымліваюць у сярэднім 780 еўраў (1 950 рублёў), у ахове здароўя і сацыяльнай рабоце - 932 еўраў (2 283 рублі).

З верасня мінімальны заробак настаўнікаў у Латвіі падвышаны на 30 еўраў - да 710 еўраў (1 740 рублёў). А з 1 студзеня ва ўсіх работнікаў аховы здароўя, пачынаючы з лекараў і заканчваючы памочнікамі медсясцёр, стаўкі выраслі на 20%. З запэўненняў чыноўнікаў Міністэрства аховы здароўя, лекары ў паліклініках будуць атрымліваць 1 350 еўраў (3 308 рублёў), медсёстры і памочнікі лекараў - 810 еўраў (1 985 рублёў). А ў стацыянарах лекараў заробкі будуць вышэйшымі - 1856 (4 547 рублёў) і 1 114 еўраў (2 730 рублёў).

Украіна: у ахове здароўя зарабляюць у сярэднім 465 рублёў

Нягледзячы на ладнае падвышэнне ў мінулым годзе, украінскія заробкі пакуль самыя маленькія. Сярэдні заробак украінца за 11 месяцаў 2018 года, са звестак Дзяржаўнай службы статыстыкі, склаў 8 711 грыўняў (671 рубель). У сферы адукацыі ў лістападзе ён дасягнуў 6 938 грыўняў (534 рублі), у ахове здароўя - 6042 (465 рублёў).