Макей: У перспектыве і адзіная валюта ў нас з Расеяй калі-небудзь будзе

Кіраўнік МЗС Беларусі выказаўся аб узаемным прызнанні віз з РФ.

Беларусь і Расея працягваюць абмеркаванне пагаднення аб узаемным прызнанні віз. Тэхнічныя пытанні, якія ўзніклі ў снежні, цяпер разглядаюцца. Пра гэта паведаміў міністр замежных спраў Уладзімір Макей, паведамляе tut.by.

- Пагадненне абмяркоўваецца, нейкія рэчы яшчэ засталіся, - сказаў Макей. - Для нас самае галоўнае - адсутнасць кантролю на ўнутранай мяжы для грамадзян трэціх краін. У 1996 годзе прэзідэнт Беларусі і тагачасны прэм'ер-міністр Расеі Віктар Чарнамырдзін распілавалі гэты шлагбаум, прыбралі мяжу паміж нашымі дзяржавамі. З таго часу ніякіх праблем не было да апошняга моманту, калі з'явіліся пэўныя цяжкасці з перасячэннем у грамадзян трэціх краін праз нашу мяжу. Цяпер мы працуем з нашымі партнёрамі, - сказаў Макей.

Са слоў кіраўніка МЗС у снежні стораны не падпісалі дакумент, бо ўзніклі «тэхнічныя дэталі, якія запатрабавалі абмеркавання і з адной, і з другой стараны».

- Цяпер пытанні абмяркоўваюцца, - адзначыў Макей. - Пытанне ў тым, каб на нашай супольнай мяжы не было кантролю для грамадзян трэціх краін, як гэта было і раней, каб у нас была адзіная міграцыйная карта, якая існавала яшчэ, па-мойму, з 2004 года. Усё было нармальна, улічваліся перасячэння мяжы да пэўнага моманту, калі паўсталі нейкія праблемы.

Уладзімір Макей таксама падкрэсліў, што аб адзінай візе гаворка не ідзе, гаворка ідзе аб узаемным прызнанні віз.

- У перспектыве, можа быць, ведаеце, і адзіная валюта ў нас калі-небудзь будзе. Загадваць так далёка я не магу. Пакуль гаворка ідзе аб узаемным прызнанні віз. І трэба зрабіць так, каб гэта было ўзаемавыгадна і для грамадзян нашых краін, і наогул для абедзвюх дзяржаў, - сказаў Макей.

Раней статс-сакратар, намеснік кіраўніка МЗС Расеі Грыгорый Карасін заявіў, што Расея і Беларусь амаль закончылі падрыхтоўку пагаднення аб узаемным прызнанні віз.

«Мы вядзём цяпер працу над новым пагадненнем аб узаемным прызнанні віз. Праца ў прынцыпе закончаная. Мы разлічваем, што яна будзе найбліжэйшым часам падпісаная. У нас будзе цэлая серыя важных двухбаковых мерапрыемстваў, у рамках якіх можна будзе арганізаваць гэта падпісанне», - цытуе Карасіна РІА «Новости».

Нагадаем, на пасяджэнні саюзнага Саўміна, якое праходзіла 12-13 снежня ў Берасці, пагадненне з Расеяй аб узаемным прызнанні віз не падпісалі. Са слоў прэм'ера Беларусі Сяргея Румаса, беларуская старана не паспела закончыць унутрыдзяржаўныя працэдуры пагаднення.

14 снежня падчас прэс-канферэнцыі расейскім СМІ Лукашэнка пацвердзіў гэта і сказаў, што дакумент да яго ўжо паступіў.

Пазней на афіцыйным інтэрнэт-партале прававой інфармацыі Расеі апублікавана пакуль не падпісанае пагадненне паміж урадам Расейскай Федэрацыі і ўрадам Беларусі аб узаемным прызнанні віз. У ім вызначана, якімі дарогамі замежнікам на аўто можна заехаць у дзве краіны і чаму могуць адмовіць ва ўездзе.