Тоні Блэр выказаўся за паўторны рэферэндум аб Brexit

Экс-прэм'ер Вялікай Брытаніі мяркуе, што больш разумна было б зноў даверыцца меркаванню народа.

Былы прэм'ер-міністр Вялікай Брытаніі Тоні Блэр выступіў за правядзенне новага рэферэндуму аб далейшым знаходжанні краіны ў складзе Еўразвязу. «Гэта дасць краіне канчатковы вынік», - сказаў ён у інтэрв'ю медыякампаніі «Нямецкая хваля» на палях Сусветнага эканамічнага форуму ў Давосе ў аўторак, 22 студзеня.

«Некаторыя кажуць, што новы рэферэндум прычыніць шкоду дэмакратыі. Але ж мы зноў звяртаемся да народа, мы не пытаем кагосьці яшчэ. Цяпер у наяўнасці значна больш яснае разуменне таго, што напраўду азначае Brexit, значна лепшае разуменне ўсіх звязаных з гэтым пытанняў», - патлумачыў былы брытанскі прэм'ер.

Скепсіс у дачыненні да плана «Б»

На думку Блэра, прэм'ер-міністр Вялікай Брытаніі Тэрэза Мэй не здолее дамагчыся поспеху ў пытанні аб парадку і ўмовах Brexit і з дапамогай плана «Б». «Наколькі я разумею, гаворка ідзе пра тое, каб змяніць дамову аб умовах Brexit. Цалкам відавочна, што гэта пытанне, якое павінна развязвацца на перамовах паміж брытанскім урадам і Еўропай. Асабіста я і іншыя мяркуем, што гэты працэс - поўны хаос», - сказаў Тоні Блэр.

«Аб будучых гандлёвых стасунках з Еўропай няма згоды. Адна група людзей жадае захаваць цесныя сувязі з Еўропай. Іншая група людзей жадае цалкам парваць з гандлёвай сістэмай ЕЗ. Мы думаем, што трэба вярнуцца да пастановы народа, бо парламент паралізаваны.

Я сумняваюся ў тым, што Мэй зможа правесці праз яго якую-небудзь угоду. Няма большасці ні за адну форму Brexit. Таму самым разумным будзе вярнуцца і спытаць у народа», - растлумачыў свой пункт гледжання былы прэм'ер-міністр Вялікай Брытаніі.