Мэркель выступіла за рэфармаванне міжнародных арганізацый

На форуме ў Давосе канцлерка ФРГ заклікала зрабіць усё магчымае, каб не паўтарыўся крызіс 2008 года.

Канцлерка ФРГ Ангела Мэркель уважае неабходным рэфармаванне арганізацый, якія адказваюць за міжнароднае супрацоўніцтва.

Пра гэта Мэркель заявіла ў сераду, 23 студзеня, падчас 49-га штогадовага Сусветнага эканамічнага форуму ў Давосе, паведамляе DW.

З яе слоў, разам з Нямеччынай цэлы шэраг сусветных гульцоў падтрымлівае «ўмацаванне шматбаковага парадку». Яго парушэнне прывяло б да паніжэння прагнозу сусветнай росту, падкрэсліла яна.

«Думаю, нашы нацыянальныя інтарэсы павінны ўлічваць інтарэсы іншых краін», адзначыла канцлерка ФРГ. Глабальная архітэктура міжнароднай палітыкі будзе працаваць толькі ва ўмовах «нашай гатоўнасці да кампрамісу», упэўненая Мэркель.

Рэформа як рэакцыя на выклікі

Пры гэтым Ангела Мэркель звярнула ўвагу на цэлы шэраг выклікаў, уключаючы змены клімату, прыродныя катастрофы, кібератакі і пагрозу тэрарызму. Усе яны вядуць да «збояў і няўпэўненасці» ў стабільнасці шматбаковага светапарадку. У гэтай сувязі рэфармаванне міжнародных арганізацый неабходнае, падкрэсліла яна.

Нямеччына, між іншым, паслядоўна выступае за пераўтварэнне фармату Рады Бяспекі ААН. У канцы 2018 года міністр замежных спраў ФРГ Хайка Мас заявіў агенцтву dpa, што структура гэтай арганізацыі, створаная 70 гадоў таму, састарэла. У сувязі з гэтым Нямеччына гатова ўзяць больш адказнасці за развязанне міжнародных праблем і ўвайсці ў склад Рады бяспекі ААН у якасці пастаяннага сябра, адзначаў Мас.

Не дапусціць паўтарэння крызісу

Выступаючы перад удзельнікамі форуму ў Давосе, Мэркель, між іншым, заклікала сусветную супольнасць зрабіць усё магчымае, каб не дапусціць паўтарэння банкаўскага крызісу 2008 года. «Будзем сумленнымі - гэты крызіс усё яшчэ адчуваецца. Ён прывёў да незвычайных страт даверу не толькі ў галіне палітыкі, але таксама ў эканамічнай сферы, асабліва фінансавым сектары», рэзюмавала канцлерка Нямеччыны.

Цяперашні форум у Давосе праходзіць у адсутнасць прэзідэнтаў ЗША і Францыі Дональда Трампа і Эмануэля Макрона, а таксама прэм'ер-міністаркі Вялікабрытаніі Тэрэзы Мэй. Дэвіз сустрэчы - «Глабалізацыя 4.0: У пошуках глабальнай архітэктуры ў стагоддзе чацвёртай прамысловай рэвалюцыі».