Мэр-дэмакрат Піт Бутыджыч абвясціў пра вылучэнне ў прэзідэнты ЗША

37-гадовы мэр горада ў Індзіану разлічвае вылучыцца на фоне астатніх кандыдатаў як палітычны аўтсайдэр.

Дэмакрат Піт Бутыджыч, мэр горада Саўт-бэнд у Індзіану, у сераду абвясціў пра вылучэнне ў прэзідэнты на выбарах 2020 года. Палітык разлічвае вылучыцца на фоне астатніх кандыдатаў як палітычны аўтсайдэр, паведамляе «Голос Америки».

Адносна малавядомы ў палітыцы, 37-гадовы Бутыджыч, двойчы абраны мэрам у горадзе з насельніцтвам 100000 чалавек, настойвае, што ў кіраўніцтве Дэмакратычнай партыі патрэбныя новыя асобы, здольныя знайсці агульную мову з рабочым класам, які адвярнуўся ад дэмакратаў у 2016 годзе, зрабіўшы выбар на карысць рэспубліканца Дональда Трампа.

У электроннай рассылцы і відэазвароце да прыхільнікаў Бутыджыч стараўся зрабіць акцэнт на пошукі новых развязанняў, у процівагу настальгічнай рыторыцы Трампа, што адсылае да мінулага Амерыкі.

«Маё пакаленне - гэта пакаленне людзей, якое бачыць стральбу ў школах з тых часоў, як я вучыўся ў старэйшых класах. Гэта пакаленне, якое змагалася ў войнах пасля 11 верасня, першае пакаленне, якому давялося сутыкнуцца з рэаліямі глабальнага пацяплення, і першае пакаленне, якое ў матэрыяльным плане не будзе жыць лепш, чым нашы бацькі, - калі нічога не зменіцца», - заявіў палітык.

Як чакаецца, у барацьбе за прэзідэнцкую намінацыю ад Дэмакратычнай партыі возьмуць удзел мноства кандыдатаў, якія жадаюць кінуць выклік Трампу, які, хутчэй за ўсё, будзе вылучаны ад Рэспубліканскай партыі. Бутыджыч сфармаваў даследчы камітэт, каб пачаць збор сродкаў і набор супрацоўнікаў у перадвыбарчы штаб.

Яму будзе няпроста атрымаць фінансаванне і сабраць кааліцыю, улічваючы, што ў гонцы будуць браць удзел шмат кандыдатаў з больш гучнымі імёнамі і больш шырокімі сувязямі. На дэмакратычную намінацыю, між іншым, прэтэндуюць сенатары Элізабэт Уорэн, Камала Харыс і Кірстэн Джылібрэнд, сябра Палаты прадстаўнікоў Тулсі Габард і былы мэр Сан-Антоніа і міністр жыллёвага будаўніцтва Хуліан Кастра.

Бутыджыч прызнаў, што ва ўмовах такой канкурэнцыі яго шанцы невысокія, аднак падкрэсліў унікальнасць сваёй кандыдатуры: «У такі момант кандыдат, якога ўважаюць бесперспектыўным, можа зайсці далей, чым звычайна дазволіў бы істэблішмэнт, у тым, што тычыцца смелых ідэй, сапраўды здольных адлюстраваць пагрозы і раскрыць магчымасці, якія сустракаюцца на нашым шляху».

Бутыджыч выйшаў на агульнанацыянальную палітычную арэну ў 2017 годзе, беспаспяхова высунуўшыся на пасаду старшыні Нацыянальнага камітэта Дэмакратычнай партыі. Экс-прэзідэнт Барак Абама ў адным з інтэрв'ю незадоўга да сыходу з пасады назваў яго перспектыўным маладым дэмакратам.