Зяленскі: Я быў у Менску і бачыў, якія каналы там транслююцца
23- 11.10.2019, 9:53
- 18,064
Прэзідэнт Украіны хацеў бы, каб у Беларусі трансляваліся некалькі ўкраінскіх тэлеканалаў.
Пра гэта Уладзімір Зяленскі заявіў падчас прэс-марафону 10 кастрычніка, адказваючы на пытанне карэспандэнткі «Белсата» Адэлі Дубавец.
«Я вельмі хачу, каб людзі, якія жывуць у Беларусі, не мелі інфармацыйнага вакууму з нагоды таго, што адбываецца ва Украіне, мелі іншы погляд. Я разумею, трансляцыя якіх каналаў ідзе ў Беларусі, бо я шмат разоў быў у Менску і бачыў, якія каналы там транслююцца», – заявіў украінскі прэзідэнт.
Ён адзначыў, што хацеў прапанаваць кіраўніку Беларусі запуск перш за ўсё забаўляльных каналаў, але, паводле ягоных словаў, Лукашэнка пагадзіўся і на трансляцыю тых, якія асвятляюць палітычныя тэмы.
Уладзімір Зяленскі мяркуе, што на беларускі рынак павінны выйсці перш за ўсё самыя рэйтынгавыя каналы, дзе «ёсць якасны прадукт – якасныя серыялы, якасныя праграмы, якасныя навіны».
У лютым 2019 года ў Беларусі пачаліся трансляцыі ўкраінскага дзяржаўнага канала «UA TV». Пакуль гэта адзіны тэлеканал з Украіны, які транслюецца на беларускую тэрыторыю.
Нагадаем, 10 кастрычніка ў Кіеве Зяленскі даваў вялікі прэс-марафон, падчас якога павінен быў адказаць на пытанні 300 журналістаў. Прэс-канферэнцыя доўжылася больш за 14 гадзінаў.