Палова ўкраінцаў мяркуюць, што новая ўлада лепшая за папярэднюю
36- 11.10.2019, 15:54
- 10,441
Украінскія сацыёлагі распавялі аб падтрымцы новага прэзідэнта і парламента.
48% украінцаў мяркуюць, што цяперашняя ўлада лепшая, чым папярэдняя, 27% - што яна нічым істотна не адрозніваецца ад папярэдняй, а 8% - што яна горшая за папярэднюю. Пра гэта паведамляе «Украінская праўда» са спасылкай на вынікі апытання Цэнтра Разумкова, праведзенага 4-9 кастрычніка.
Увогуле, характарызуючы дзеянні ўлады, 41,5% рэспандэнтаў мяркуюць, што новая ўлада спрабуе палепшыць сітуацыю ў краіне, але ёй гэта пакуль у асноўным не ўдаецца.
29% апытаных мяркуюць, што новая ўлада спрабуе палепшыць сітуацыю ў краіне і шмат у чым ёй гэта ўдаецца. Яшчэ 20% перакананыя, што новая ўлада не спрабуе палепшыць сітуацыю ў краіне, а толькі імітуе намаганні ў гэтым кірунку.
23% рэспандэнтаў адзначылі, што дзеянні новай улады апраўдалі іх надзеі, а 5% - што дзеянні новай улады выявіліся лепшымі, чым яны чакалі.
9% заявілі, што новая ўлада не апраўдала іх надзей, 12% - што ад новай улады яны нічога добрага не чакалі, так і адбылося, 6% - што яны ад новай улады нічога добрага не чакалі, але яна выявілася яшчэ горшай, чым яны думалі.
Пры гэтым 40% апытаных грамадзян прытрымліваюцца думкі, што яшчэ занадта рана даваць ацэнку дзеянням улады.
54,5% апытаных думаюць, што дзеянні прэзідэнта Уладзіміра Зяленскага ў першую чаргу накіраваныя на абарону агульнанацыянальных інтарэсаў, а 24,5% - на абарону ўласных інтарэсаў і інтарэсаў свайго палітычнага асяродка.
Даследаванне праводзілася з 4 да 9 кастрычніка 2019 года. Усяго было апытана 2015 рэспандэнтаў ва ўзросце ад 18 гадоў ва ўсіх рэгіёнах Украіны, за выключэннем Крыма і акупаваных тэрыторый Данецкай і Луганскай абласцей. Тэарэтычная хібнасць выбаркі (без уліку дызайн-эфекту) не перавышае 2,3% з імавернасцю 0,95.