Турчынаў: Незалежная Украіна пачынаецца за спіной жаўнера ў акопе на перадавой
27- 11.10.2019, 18:41
- 12,085
Расея ніколі не выконвае ўзятыя на сябе абавязацельствы.
Пра гэта сказаў экс-сакратар Рады нацыянальнай бяспекі і абароны Украіны Аляксандр Турчынаў у эфіры праграмы «Права на ўладу», піша censor.net.ua.
Ён нагадаў, што ў 2016 годзе ўжо быў досвед развядзення сіл і ў Залатым, і ў Пятроўскім: «Як толькі нашы войскі адышлі, адразу ж расейска-тэрарыстычныя групоўкі паспрабавалі палепшыць свае пазіцыі і зноў з крывёю і рызыкай для жыцця давялося вяртаць свае межы».
«Можна не прыслухоўвацца да былых сілавікоў, але прыслухайцеся да жалезнага канцлера Нямеччыны Ота фон Бісмарка. Яшчэ некалькі стагоддзяў таму ён сказаў: «Дамовы з Расеяй не каштуюць і паперы, на якой напісаныя».
Са слоў Аляксандра Турчынава, Расея лічыцца толькі з сілай, таму моцнае войска, магутны сектар бяспекі і абароны, - толькі гэта ўкраінцаў можа абараніць. «На гэта трэба працаваць усёй краіне, і вакол гэтага трэба аб'ядноўвацца ўсім палітычным сілам», - падкрэсліў ён.
«У нас ёсць адна ўкраінская формула, даведзеная крывёй нашых патрыётаў - вольная незалежная Украіна пачынаецца толькі за спіной нашага жаўнера ў акопе на перадавой. З гэтага пункту пачынаецца наша прававое поле, дзеянне нашай Канстытуцыі і спакой грамадзян. Пра перамогу можна казаць толькі тады, калі гэты акоп будзе на нашай усходняй мяжы», - рэзюмаваў Аляксандр Турчынаў.