У Брытаніі Барыса Джонсана на тэледэбатах замянілі ледзяной фігурай

Дэбаты былі прысвечаныя зменам клімату.

У Брытаніі падчас тэледэбатаў на тэлеканале Channel 4, прысвечаных зменам клімату, выкарыстоўвалі ледзяныя фігуры замест прэм'ер-міністра Барыса Джонсана і лідара партыі Brexit Найджэла Фараджа, якія не прыйшлі ў студыю, паведамляе nv.ua.

Як паведамляе Sky News, лідары іншых пяці партый - Лейбарысцкай, Ліберальных дэмакратаў, Зялёных, Партыі Уэльса і Шатландскай нацыянальнай партыі - на дэбаты прыйшлі і абмяркоўвалі на іх кліматычныя праблемы.

На месцах, прызначаных для Джонсана і Фараджа, стаялі ледзяныя фігуры з выявай Зямлі, якія раставалі падчас эфіру.

У Кансэрватыўнай партыі, лідарам якой з'яўляецца Джонсан, назвалі ўчынак Channel 4 парушэннем кодэкса пра вяшчанне і накіравалі скаргу брытанскаму рэгулятару СМІ Ofcom.

У лісце кансерватары просяць праверыць гэтую «правакацыйную выхадку», якая, на іх думку, парушыла прынцып бесстароннасці і «сама па сабе стала выказваннем палітычнага меркавання».

У Брытаніі пройдуць датэрміновыя выбары 12 снежня.

Іх ініцыяваў Барыс Джонсан, каб правесці праз парламент пагадненне аб Brexit. Раней дэпутаты адпрэчвалі ўгоды з Брусэлем.