Як сербы прымусілі Лукашэнку плакаць

У чым цымус стасункаў Беларусі з гэтай балканскай краінай.

2-3 снежня Аляксандр Лукашэнка зробіць афіцыйны візіт у Сербію. Як паведамляе ягоная прэс-служба, у Бялградзе ён правядзе перамовы з сербскім калегам Аляксандрам Вучычам.

У гэтыя ж дні ў Бялградзе пройдзе беларуска-сербскі бізнэс-форум, на якім чакаецца падпісанне камерцыйных кантрактаў і пагадненняў.

«Салідарнасць» сабрала цікавыя факты пра беларуска-сербскія стасункі.

Скандал на Еўрагульнях: «Лукашэнка ледзь не плакаў»

Трэба сказаць, што з гэтай еўрапейскай дзяржавай у Лукашэнкі даволі нетыповыя ўзаемастасункі. Мабыць, ані да адной іншай краіны заходняга свету Лукашэнка не дэманструе такой адданай любові. І сербскае кіраўніцтва адказвае ўзаемнасцю.

Апошні раз Лукашэнка і прэзідэнта Сербіі бачыліся ў чэрвені гэтага года. Тады Аляксандр Вучыч прылятаў у Менск, каб наведаць II Еўрапейскія гульні. Праўда, гэты візіт суправаджаўся скандалам. Сербскі госць не пайшоў на цырымонію адкрыцця, бо на ёй прысутнічаў прэзідэнт Косава. І як ні маліў Лукашэнка, Вучыч застаўся непахісным.

- Мне было вельмі цяжка паведаміць гаспадару, Лукашэнку, што я не прыйду на цырымонію, бо я ведаю, як шмат ён зрабіў — распавёў Вучыч у інтэрв'ю сербскаму інфармагенцтву. - З аднаго боку ён пасадзіў побач з сабой Мядзведзева, а з другога хацеў пасадзіць мяне. Гэта вялікі гонар. Ён сказаў, што не пойдзе на стадыён без мяне. Мне было цяжка бачыць, як гэты дужы мужчына ледзь не плакаў, калі я казаў, што не магу там знаходзіцца.

Паводле слоў Вучыча, Лукашэнка быў сумленным і карэктным. Гэта выявілася ў тым, што ў тых месцах, якія не наведвала інспекцыя Міжнароднага алімпійскага камітэта, сцяга Косава не было, а прэзідэнта гэтай не прызнанай Сербіяй дзяржавы Хашыма Тачы не пасадзілі ў ложу для vip-гасцей.

- Яны паклапаціліся пра нас, і мне шкада, што я расчараваў беларускага прэзідэнта, але ў мяне не было іншага выбару — сказаў сербскі лідар.

Толькі бізнэс і крыху асабістага

Паводле нейкага неймавернага збегу абставінаў «незалежны сербскі назіральнік» на так званых выбарах у Беларусі Драгамір Карыч выявіўся адным з суўладальнікаў кампаніі, якая вось ужо шмат гадоў паспяхова вядзе свой бізнэс у Беларусі.

Уладальнікі Сербскай кампаніі Dana Holdings указамі Лукашэнкі атрымалі пад забудову некалькі дзялянак зямлі ў Менску, у тым ліку на Кастрычніцкай плошчы. Іх бізнэсу тэлеканала «Белсат» прысвяціў расследаванне, у якім, напрыклад, сцвярджаецца наступнае:

— Кошты жылля ў Менску штучна завышаныя на дзясяткі адсоткаў. Гэтыя грошы ідуць не ў бюджэт, а ў схемы з прыкметамі карупцыі, якія вядуць да самых вярхоў улады.

Як паведамляў раней «Ежедневник», чысты прыбытак беларускіх кампаній холдынгу Astra Group, кантраляванага сербскімі мільянерамі Драгамірам і Багалюбам Карычамі, летась перавысіў 50 млн даляраў (увайшоў у лік самых прыбытковых кампаній Беларусі).

Сербскія сябры Лукашэнкі настолькі ўпэўнена сябе адчуваюць у нашай краіне, што пачалі пазначаць тэрыторыю ўласным фамільным гербам.

За ўвесь час дзейнасці ў Беларусі намаганнямі Dana Holdings да 2019 года было пабудавана і прададзена больш за мільён квадратных метраў. Быў уведзены ў эксплуатацыю адзін з найбуйнейшых у краіне гандлёвых цэнтраў Dana Mall і бізнэс-цэнтр Dana Center.

Цяпер кампаніі холдынгу будуюць жылы квартал «Мінск Мір «ля былога менскага аэрапорта, а таксама жылыя комплексы Vogue і «Парк Чэлюскінца». Усяго ў Беларусі зарэгістраваныя 7 арганізацый з удзелам сербскага капіталу.

Праца на «сям'ю»

Дасталася трошкі і сям'і. Відавочна, у падзяку за смачныя кавалкі зямлі ў сталіцы, будаўнічая кампанія Dana Holdings стала генеральным спонсарам Нацыянальнага алімпійскага камітэта (НАК), якім з красавіка кіруе Віктар Лукашэнка, памочнік бацькі ў нацыянальнай бяспецы, які курыруе ўвесь сілавы блок.

Дарэчы, жонка Віктара Лілія Лукашэнка ўжо некалькі гадоў працуе дырэктаркай галерэі «Арт Хаос». Таксама па чыстай выпадковасці гэтая галерэя размяшчаецца ў гандлёвым цэнтры Dana Mall і з'яўляецца адным з галоўных мецэнацкіх праектаў кампаніі, падкантрольнай братам Карычам.

На адну з выстаў нават прыехала дэпутатка парламента Сербіі Міланка Карыч, якая па сумяшчальніцтве з'яўляецца яшчэ і жонкай аднаго з братоў Карычаў Багалюба.

Месца для адпачынку

Але што мы толькі аб працы? Сербія заўсёды была гатовая запрасіць на свае курорты Лукашэнку і ягоную сям'ю. Яшчэ ў 2009 годзе Аляксандр Лукашэнка прыехаў на адпачынак на гарналыжны курорт Капаонік.

Як пісала выданне Вorba, менавіта Драгамір Карыч сустракаў Лукашэнку ў аэрапорце. Адтуль госці накіраваліся ў гатэль «Гранд». Паводле інфармацыі выдання, два вечары запар да позняй ночы Лукашэнка разам з Карычам і вялікай кампаніяй правёў у клубе, дзе гучалі прамовы ў гонар Сербіі, Расеі і Слабадана Мілошавіча.

У гатэлі «Гранд» распавялі, што разам з Лукашэнкам былі і «дзеці з сем'ямі».

А ў 2015 годзе сербскія СМІ паведамілі пра прыезд Віктара Лукашэнкі, які «з ахоўнікамі зноў прыбыў у Капаонік». Планавалася, што да яго можа далучыцца бацька, але гэтага не адбылося, паведамлялі выданні.

Зрэшты, Лукашэнка пабываў у Сербіі незадоўга да гэтага. У чэрвені 2014-га ён прыбыў з візітам у Бялград. Як можна было меркаваць з тэлерэпартажаў, у гэты час ад яго ні на крок не адступаў Драгамір Карыч.

І вось зноў Сербія гасцінна гатовая прыняць Лукашэнку. Падчас размовы з прэзідэнтам Вучычам у чэрвені гэтага года Лукашэнка заявіў:

- Сербія - гэта не толькі прыярытэт нашых дачыненняў, гэта блізкая нам краіна, гэта блізкі нам народ. Вы ведаеце, што такое Сербія для мяне асабіста.

І, відавочна, быў шчырым.