«Працавалі тры тыдні без выходных за ежу і $100 «зверху»

Будаўнік з Гародні распавёў праўду аб досведзе падпрацоўкі на горна-абагачальным заводзе.

У канцы кастрычніка брыгада гарадзенскіх будаўнікоў з'ехала ў Петрыкаў на працу. Мужчынам трэба было рабіць перакрыццё на горна-абагачальным камбінаце. Буйны аб'ект даваў шмат надзей у плане заробку. На першым сходзе, са слоў будаўнікоў, падрадчыкі абяцалі ім заробак ад 1000 рублёў і вышэй, камандзіровачныя ў суме 8 рублёў на дзень, добрыя ўмовы працы. Але выйшла ўсё зусім інакш.

Рэдакцыі сайта s13.ru вядомыя два варыянты, як развіваліся падзеі далей. Першы - ад будаўнічай брыгады. Другі - ад падрадчыка будаўнічага аб'екта. Абодва бакі ўпэўненыя, што маюць рацыю. Будаўнікі рыхтуюць заяву ў пракуратуру за парушэнне працоўнага кодэкса. Падрадчыкі кажуць, калі трэба будзе, у міліцыю напішам «за паклёп».

"Працавалі без выходных па 10-12 гадзін на дзень за ежу і трохі зверху»

Гарадзенскія будаўнікі на мінулым тыдні вярнуліся з заробкаў у Петрыкаве. Там мужчыны прапрацавалі тры тыдні. Замест годнага заробку дадому прывезлі дзесьці па 200 рублёў, распавёў s13.ru адзін з будаўнікоў. Працу на горна-абагачальным камбінаце хлопцам прапанаваў знаёмы з Полацка.

— Першапачаткова ўсё было прыгожа на словах. Мы прыехалі ў Петрыкаў 29 кастрычніка. Нас прывезлі ў арандаваны для нас дом. У брыгадзе было 5 гарадзенскіх рабочых і 2-з іншых гарадоў. Падрадчыкі правялі для нас сход, дзе распавялі пра ўмовы працы: харчаванне за кошт фірмы (з разліку 8 рублёў на дзень), заробак ад 1000 рублёў і вышэй. Гаварылі, што будзе ўсё максімальна механізаванае: пад'ёмнікі, ліфты і гэтак далей. Акрамя гэтага, абяцалі выдаць спецвопратку, і заўсёды гарачы чай у бытоўцы.

У першы дзень мы атрымалі толькі летнія штаны і кофту. Праца наша была пад адкрытым небам, на ветры, часам пад дажджом. Людзі пачалі хварэць. Праз паўтары тыдні нам нарэшце выдалі бушлаты.

У першы тыдзень нам далі 400 рублёў на семярых. І гэта ўжо не па 8 рублёў на дзень выходзіла, як абяцалі раней. Ну добра, мы прамаўчалі. На наступны тыдзень нам далі 300 рублёў. Мы пачалі абурацца. Але на нашы пытанні, маўляў, дзе нашы абяцаныя грошы, нам сказалі: «Вы не камандзіровачныя, каб вам іх плаціць». Мы патэлефанавалі субпадрадчыку, на наступны дзень нам прывезлі яшчэ 210 рублёў. У пятніцу далі яшчэ 200 рублёў — узгадвае адзін з будаўнікоў.

Са слоў рабочых, праблемы былі не толькі з аплатай сутачных. Не заўсёды былі неабходныя інструменты, а пад'ёмнікам змаглі скарыстацца толькі некалькі разоў.

- Мы ўздымалі 30-кілаграмовыя лісты на вышыню 13 метраў уручную. Ліфты ўвесь час адмаўляліся працаваць, мы не маглі імі скарыстацца. Зрэзалі старую арматуру навесу: адзін вісіць, іншы яго целам трымае, каб той не ўпаў. Вышку нам не далі, патлумачыўшы, што гэта немагчыма. Хоць у пачатку працы нам казалі: Не рызыкуйце.

Бывала, што даводзілася пальчаткі выпрошваць. Мы працавалі «балгаркай». Часта пальчаткі проста перагаралі ад іскраў. Прыходзілі да заўгаса, прасілі памяняць. Нам адказвалі: вам трэба 2 пары на тыдзень, не больш.

На аб'ект будаўнікі прыязджалі а 7.30. З'язджалі блізу 19.00. Працавалі без выхадных. Нават дзень выбараў, згадваюць, быў рабочым днём. За тры тыдні гарадзенскія будаўнікі выканалі дэмантаж старой апалубкі і мантаж новай агульнай плошчай 883 м. кв.

- Першапачаткова нам паўтаралі: усе грошы «ў бетоне», пойдуць бетонныя працы, пойдзе і заробак асноўны. Калі мы зрабілі ўсю «чорную» працу - апалубку, завязалі арматуру - нам сказалі: едзьце дадому. Маўляў, мы не ўклаліся ў тэрміны. Апалубку трэба было зрабіць да 15-га, а мы здалі яе 19-га нібыта. Але першапачаткова ніякіх тэрмінаў нам ніхто не ўстанаўліваў. Да таго ж праз памылкі ў праекце мы страцілі амаль два дні працы.

Дарэчы, дамову найму будаўнікі ўпершыню ўбачылі і падпісалі толькі ў апошні працоўны дзень.

- Ужо калі нас пачалі адпраўляць дадому, я стаў намагаць, каб нам прывезлі дамову. Разам з ім і акт выкананых работ. Згодна з ім, нашай брыгадзе было пакладзена да выплаты 1435 рублёў на семярых. Тыя грошы, якія нам давалі на ежу, уключылі ў аванс. Проста прыехалі, кінулі нам пачак грошай са словамі: «разбірайце!». Калі яны з'ехалі, высветлілася, што там 160 рублёў не стае. Я тэлефанаваў ім, але мне сказалі, што такога быць не можа, маўляў усё пералічанае. Тэлефон выключылі, мяне заблакавалі. У выніку нам яшчэ давялося скідвацца на заробак аднаго мужчыны з брыгады. На рукі атрымалі агулам па 220-230 рублёў.

Журналісты звязаліся з ТАА, каб пачуць іх меркаванне з нагоды апісанай сітуацыі.

- Людзі працавалі нязладжана і неаператыўна. У нас на аб'екце працуе 6 брыгад. У кожнай розная эфектыўнасць. У кагосьці 5 рублёў на гадзіну, у кагосьці 4. Усё залежыць ад чалавека і брыгады. Эфектыўнасць гэтай брыгады была 2,1 рубель за гадзіну. За змену ў іх выходзіла дзесьці рублёў 20. Адна брыгада той аб'ём працы, які выконвалі гэтыя будаўнікі за 21 дзень, выканала за 1 дзень — распавядае s13.ru кіраўнік праекта Аляксандр.

Аднак, на сайце водгукаў аб кампаніі ёсць адзіны каментар, пакінуты яшчэ летам.

На прадпрыемстве-заказчыку растлумачылі, што не маюць інфармацыі аб дзейным субпадрадчыку. Дамова у іх укладзеная з генеральным падрадчыкам. Гэта значыць, што каментаваць гэты інцыдэнт яны не могуць.

Цяпер гарадзенскія будаўнікі рыхтуюць ліст у пракуратуру з просьбай звярнуць увагу на дзеянні гэтай кампаніі.

- Мы таксама можам звярнуцца ў міліцыю з заявай аб паклёпе, і будзем мець рацыю, — заявіў прадстаўнік ТАА.