Мікалай Уласевіч: Рана ці позна ім давядзецца адказаць перад законам

Актывіст абураны свавольствам і абуральным беззаконнем «выбарчых камісій».

Актывіст Мікалай Уласевіч атрымаў адказ з акруговай «выбарчай камісіі» на свае дзве скаргі, якія ён раней падаў у Астравецкі РАУС і раённую пракуратуру, піша «Гродненская весна».

Афіцыйны адказ выклікаў справядлівае абурэнне грамадскага актывіста. На думку камісіі, нібыта гэта Уласевіч праводзіў відэаздымку без дазволу старшыні ўчастковай камісіі, выкрыкваў «неабгрунтаваныя прэтэнзіі» ў адрас членаў камісіі, за што яго нарэшце і выдалілі з «выбарчага ўчастка».

Мікалай Уласевіч распавёў, як усё было напраўду:

«17 лістапада а 19:45 я, як давераная асоба, зайшоў на ўчастак для назірання за падлікам галасоў, павітаўся, бо я не прыходзіў на ўчастак у гэты дзень і не галасаваў, і сеў на месца, адведзенае назіральнік. Праз некалькі хвілін да мяне падышла старшыня ўчастковай камісіі Надзея Субач з раскрытай брашурай метадычных рэкамендацый ЦВК і моўчкі прапанавала пачытаць, паказаўшы пальцам адзначанае месца.

Я прачытаў і спытаў старшыню камісіі, што яна гэтым хоча сказаць. Яна адказала, што я магу знаходзіцца на ўчастку толькі да 20.00, а потым павінен пакінуць яго. Я запярэчыў, і сказаў што як давераная асоба я магу прысутнічаць на падліку галасоў, пры гэтым папрасіў Выбарчы кодэкс і зачытаў для ўсёй камісіі ч.4 арт.13, дзе гэта маё права цалкам пацвярджалася.

Пры гэтым, я таксама растлумачыў, што ў гэтым выпадку трэба кіравацца перш за ўсё ВК, а не падзаконным актам, якім з'яўляюцца метадычныя рэкамендацыі, што яго тлумачаць і ў гэтым выпадку тлумачаць няправільна або няпоўна. Старшыню камісіі гэтыя мае довады не пераканалі, бо роўна а 20:00 ён прапанаваў мне пакінуць участак, на што я заявіў, што пакіну ўчастак, калі мне будзе выдадзеная на рукі пастанова камісіі аб выдаленні мяне з участку для наступнага абскарджання. Але на гэта маё патрабаванне старшыня камісіі проста моўчкі дала каманду ўчастковаму інспектару Іканапула, які прапанаваў мне пакінуць участак. Мне нічога не заставалася, як падпарадкавацца адкрытаму самавольству і сысці, аднак перад сыходам я заявіў, што абскарджу гэта абуральнае беззаконне і раней ці пазней за ўсё гэта ўсё вінаватыя адкажуць па ўсёй строгасці закона».

Мікалай Уласевіч мяркуе, што старшыня Раіса Захарыч насуперак патрабаванню Выбарчага Кодэксу (ч.5 арт.49-1) не запрасіла яго на разгляд скаргаў і ўзяла пад абарону падпарадкаваную сабе асобу - старшыню ўчастковай камісіі. Усё гэта было зробленае наўмысна, з тым разлікам таксама, каб не было магчымасці абскардзіць адмову ў наступнай інстанцыі што да «выбараў».

Аднак Мікалай Уласевіч мае намер прадаўжаць абскарджваць неправамерныя дзеянні чальцоў камісіі, якія падпадаюць, на ягоную думку, нават пад крымінальную адказнасць.