Маніфестанты ў Мадрыдзе запатрабавалі адстаўкі ўрада

Апазіцыя выступае супраць дыялогу Гішпаніі ды Каталоніі.

У Мадрыдзе тысячы пратэстоўцаў патрабавалі адстаўкі ўрада, няздольнага, на іх думку, абараніць адзінства краіны ад сепаратыстаў. Карэспандэнт DW пабываў на найбуйнейшым у гісторыі горада мітынгу.

Блізу 200 тысяч чалавек, якія прыбылі ў Мадрыд з усіх канцоў Гішпаніі, узялі ўдзел у пратэстнай акцыі ў нядзелю, 10 лютага. Арганізатарамі маніфестацыі, якая адбылася на плошчы Калумба і прылеглых да яе праспектах, выступілі сем апазіцыйных партый, а таксама шматлікія грамадскія арганізацыі. Такой колькасці ўдзельнікаў пратэстныя акцыі ў сталіцы, са сведчанняў прадстаўнікоў гарадской адміністрацыі, яшчэ ніколі не збіралі. Цікава, што ў маніфестацыі ўзялі ўдзел не толькі прадстаўнікі апазіцыйных цяперашняму ўраду сіл, але і сацыялісты, не згодныя з лініяй кіраўніцтва сваёй партыі.

Заклік да датэрміновых выбараў

Нагодай для акцыі паслужыла незадаволенасць гішпанцаў саступкамі, якія робіць кіроўная Гішпанская сацыялістычная рабочая партыя (ГСРП) сепаратыстам Каталоніі. На гэтыя саступкі, "якія ставяць пад пагрозу суверэнітэт Гішпаніі", урад ідзе ў разліку на падтрымку каталонскіх дэпутатаў у заканадаўчай палаце. Бо ІСРП не валодае парламенцкай большасцю і для зацвярджэння сваіх ініцыятыў "мае патрэбу ў галасах іншых фракцый", адзначаецца ў заяве арганізатараў маніфэстацыі.

Дакумент мае патрабаванне неадкладнай адстаўкі кіроўнага кабінета і правядзенне датэрміновых парламенцкіх выбараў. У заяве таксама крытыкуецца эканамічная палітыка ўрада. Да прыкладу, значны рост падаткаў на прадпрыемствах прывёў да закрыцця вытворчасцяў. Толькі летась у студзені ў краіне было страчана 200 тысяч працоўных месцаў. Паводле колькасці беспрацоўных (14,3 адсотка працаздольнага насельніцтва) Гішпанія саступае ў Еўразвязе толькі Грэцыі.

Пераступілі "забароненую рысу"

Напярэдадні маніфестацыі адзін з яе арганізатараў - лідар ліберальнай партыі "Грамадзяне" - Альбер Рывэра нагадаў журналістам, што ўрад "перайшоў забароненую рысу" - выйшаў на перамовах з сепаратыстамі "за рамкі сваіх паўнамоцтваў, груба парушыў канстытуцыю краіны". Ён меў на ўвазе сакрэтнае абмеркаванне ўрадавымі чыноўнікамі і прадстаўнікамі Каталоніі, якое стала здабыткам грамадскасці, такіх пытанняў як каталонскі суверэнітэт, адмова ад ужывання з боку дзяржавы сілы супраць прыхільнікаў гэтага суверэнітэту і зняццё абвінавачванняў з каталонскіх палітыкаў-сепаратыстаў, якія чакаюць суда за арганізацыю бунту восенню 2017 года.

Газета АВС, каментуючы выказванні Рывэры, адзначае, што пытанне, якое тычыцца тэрытарыяльнага ладу, не можа, у адпаведнасці з канстытуцыяй Гішпаніі, разглядацца на ўзроўні выканаўчай улады, а толькі ў парламенце з наступным вынясеннем на нацыянальны рэферэндум. Ну, а ўсе юрыдычныя пытанні, уключаючы зняццё абвінавачванняў з падсудных, застаюцца ў дэмакратычным грамадстве прэрагатывай суда, але ніяк не чыноўнікаў.