Антон Герашчанка: Валанцёры «Міратворца» выкрылі блізу 300 баевікоў «Вагнера»

Баевікі завербаваліся для ўдзелу ў вайне на Данбасе, у Крыме і Сірыі.

Валанцёры ўкраінскага сайта "Міратворац" стварылі сетку сайтаў, на якіх ад імя прыватнай вайсковай кампаніі "Вагнер" нібыта наймалі баевікоў для вайсковай службы на Данбасе, у Крыме, у Сірыі і Афрыцы. За паўтара года на аб'явы адгукнуліся 300 патэнцыйных баевікоў, якія мелі вайсковы досвед. Пра гэта на сваёй старонцы ў Facebook паведаміў народны дэпутат ад "Народнага фронту", чалец калегіі Міністэрства ўнутраных спраў Украіны Антон Герашчанка, паведамляе gordonua.com.

"Расея чарговым разам даказала, што з'яўляецца дзяржавай-тэрарыстам. Валанцёры Цэнтра "Міратворац" правялі ўнікальную інфармацыйна-псіхалагічную аперацыю, для таго каб чарговым разам паказаць, што ў Расеі тэрарызм заахвочваецца на дзяржаўным узроўні. Валанцёры "Міратворца" стварылі сетку сайтаў, на якіх ад імя ПВК "Вагнер" наймалі баевікоў для службы на ўкраінскім Данбасе, у Крыме, Сірыі, Афрыцы. на гэтыя аб'явы за паўтара года працы праекта адгукнулася больш за 300 патэнцыйных баевікоў, ужо якія мелі досвед катаванняў і забойстваў на тэрыторыі Украіны ды іншых краін. Кожны з іх праходзіў гутарку праз Skype, падчас якой дэталёва расказваў "інтэрв'юерам" з ПВК "Вагнер" пра свае злачынствы, называў прозвішчы камандзіраў сваіх бандыцкіх фармаванняў, сваіх таварышаў са службы". На пытанне "Ці гатовы ты забіваць, катаваць за грошы ўкраінцаў і ў тым ліку крымскіх татараў" адказ заўсёды быў - "Так!" - напісаў Герашчанка.

Паводле ягоных слоў, дзякуючы атрыманых звесткам база "Міратворца" папоўнілася "тысячамі" новых імёнаў расейскіх наймітаў, баевікоў і тэрарыстаў, якія ваявалі ў гарачых мясцінах ва ўсім свеце.

"Апафеозам гэтай інфармацыйна-псіхалагічнай аперацыі з кодавай назвай "За двума зайцамі" быў выклік некалькіх прэтэндэнтаў на пасаду найміта на рэальную гутарку ў горад Сімферопаль, дзе яны былі здадзеныя мясцовай паліцыі як украінскія дыверсанты, якія прыехалі ў Крым падрываць вайсковыя аб'екты", - падкрэсліў народны дэпутат.

Ён дадаў, што ўкраінскім праваахоўнікам перададзены "гігабайты інфармацыі і сотні гадзін відэа гутарак", на якіх расейскія грамадзяне прызнаюцца ва ўчыненні злачынстваў.

"Таксама гэтая аперацыя стала чарговым довадам парушэння Расеяй міжнароднай канвенцыі аб забароне фінансавання тэрарызму. Пасля вывучэння следчымі частка атрыманых довадаў будзе перададзеная ў Гаагу і папоўніць довадную базу ў пазове Украіны супраць РФ аб парушэнні канвенцыі", - сказаў Герашчанка.

Ён анансаваў паказ фільма пра тое, як была задуманая і рэалізаваная інфармацыйная спецаперацыя "За двума зайцамі", і апублікаваў трэйлер да яго.