Мэй можа скасаваць новае галасаванне аб Brexit

Брытанскія дэпутаты ўжо двойчы адхілялі пагадненне, падпісанае Тэрэзай Мэй і кіраўніцтвам ЕЗ.

Прэм'ер-міністарка Вялікабрытаніі Тэрэза Мэй можа адкласці трэцяе галасаванне аб пытаннях выхаду краіны са складу ЕЗ. Правядзенне новага галасавання "складана апраўдаць, калі загадзя вядома пра паразу", заявіў міністр замежнага гандлю Вялікабрытаніі Ліам Фокс у эфіры тэлеканала Sky News у нядзелю, 17 сакавіка, паведамляе DW.

У сваю чаргу міністр фінансаў Вялікабрытаніі Філіп Хамонд паведаміў, што ўрад не будзе выносіць пагадненне з ЕЗ на галасаванне ніжняй палаты, калі не будзе дастатковай падтрымкі сярод кансерватараў і дэпутатаў ад паўночнаірландскай Дэмакратычнай юніянісцкай партыі (ДЮП). Цяпер Мэй усё яшчэ не ўдалося заручыцца патрэбнай падтрымкай сярод сваіх аднапартыйцаў. Урад працуе над тым, каб гэтага дамагчыся, дадаў Хамонд у інтэрв'ю BBC.

Два галасаванні скончыліся крахам

14 сакавіка Палата абшчын Вялікабрытаніі выказалася за адтэрміноўку брэксіта і правядзенне трэцяга галасавання аб дамове з Брусэлем аб умовах і парадку выхаду краіны са складу Еўразвязу. Новае галасаванне прызначанае на 19 сакавіка.

З-за глыбокіх супярэчнасцяў брытанскія парламентарыі дагэтуль так і не змаглі ратыфікаваць дамову аб парадку брэксіта, узгодненага Тэрэзай Мэй з Брусэлем, і прыйшлі да высновы, што яны не паспець зрабіць усю патрэбную працу да 29 сакавіка, калі першапачаткова планаваўся момант брэксіта. Адтэрміноўка выхаду Вялікабрытаніі з ЕЗ, аднак, стане магчымай толькі ў тым выпадку, калі на яе пагодзяцца ўсе астатнія 27 краін. Дэпутаты ўжо двойчы адхілялі пагадненне, падпісанае Тэрэзай Мэй і кіраўніцтвам Еўразвязу, апошні раз гэта адбылося 12 сакавіка.