Удзельніца «Марша недармаедаў»: Улады патрабуюць вяртання «дэкрэтных» грошай

Шматдзетная сям'я магілёўцаў часова з'ехала на заробкі ў Польшчу, а беларускія ўлады псуюць ім жыццё.

Удзельніца «Марша недармаедаў-2017» у Магілёве Алена Крэнь разам з мужам паехалі туды, дзе ёсць праца, але беларуская дзяржава так лёгка не адпускае, піша mogilev.online.

Алена Крэнь разам з мужам выхоўвае чацвярых дзяцей. 15 сакавіка 2017 года яна ўзяла актыўны ўдзел у акцыі пратэсту супраць дэкрэта аб «аб дармаедах» у Магілёве. Шматдзетную маці затрымалі і адправілі на суд, дзе ёй далі штраф 10 базавых адзінак за парушэнне закона аб масавых мерапрыемствах. Цяпер жанчына аспрэчвае гэта пакаранне ў Камітэце правоў чалавека ААН.

Пяць месяцаў таму сям'я Крэнь часова пераехала жыць у польскі Гданьск. Там мужу Алены прапанавалі працу з заробкам, які наўрад ці магла прапанаваць родная беларуская дзяржава. Камандзіроўка разлічаная на год, пасля чаго сям'я, хутчэй за ўсё, вернецца ў Беларусь.

У гэтым месяцы Алена Крэнь даведалася, што дзяржава патрабуе ад яе вяртання «дэкрэтных» грошай:

- Мая сяброўка адкрыла нашу паштовую скрыню, а там ліст з Фонду сацыяльнай абароны. Тон ліста пагрозлівы, маўляў, вы ўтаілі ад нас факт свайго пераезду ў іншую краіну, таму суму дэкрэтных грошай, якія вы атрымалі за апошнія пяць месяцаў і ўсе іншыя выплаты неабходна тэрмінова вярнуць у бюджэт.

На сёння размова ідзе пра суму 2 400 рублёў. Для нашай сям'і - гэта велізарныя грошы, узяць іх пакуль няма дзе..., - паведаміла Алена.

Пры гэтым з пункту гледжання заканадаўства дзяржава мае рацыю. Алена пацвярджае, што сама згубіла з-пад увагі існаванне закона, згодна з якім пры выездзе дзяцей за межы краіны на тэрмін, большы за два месяцы выплата дапамогі спыняецца. Пры гэтым бацькі павінны даць інфармацыю па месцы атрымання дапамогі пра тое, што яны збіраюцца пакінуць тэрыторыю краіны, каб пасля не вяртаць суму пераплаты.

Выплаціць запазычанасць перад роднай дзяржавай сям'я Крэнь не адмаўляецца. Але звяртае ўвагу на тое, як па-свінску ставіцца да людзей сама сістэма:

- Праблема ў тым, што не кожная беларуская сям'я можа за адзін раз вярнуць у бюджэт суму 1200 даляраў. Я напісала ліст у адміністрацыю Кастрычніцкага раёна Магілёва, у якім апісала сітуацыю. Распавяла і пра тое, як цяжка з трыма непаўналетнімі дзецьмі знайсці патрэбную суму. Я паставіла ў вядомасць раённых чыноўнікаў аб тым, што гатовая кампенсаваць усё да капейкі, і што ўжо знайшла магчымасць заплаціць 200 рублёў з гэтай сумы. Для таго, каб вярнуць усю суму цалкам, нашай сям'і патрэбны час. Прасцей кажучы, растэрміноўка гэтай аплаты. Пра гэта я і папрасіла раённае кіраўніцтва - дайце час, расцягніце аплату, - распавяла Крэнь.

Адказу жанчына пакуль не атрымала. Затое Фонд сацыяльнай абароны насельніцтва прыстрашыў у сваім лісце, што калі 1200 даляраў не будуць выплачаныя да 15 сакавіка, то на Крэнь пададуць у суд.

- Зразумела, што я не вярну гэтыя грошы ва ўказаны тэрмін. Таму хутчэй за ўсё, будзе суд, вопіс маёмасці, што там яшчэ? Для мяне сам факт магчымага суду - прыніжэнне. Таму, з боку дзяржавы патрэбен крок насустрач, крок разважлівасці. Навошта патрэбны суд, калі я прызнаю абавязак і гатовая ўсё выплаціць. Адзінае, што не адразу, а па частках, - сказала жанчына.