Італьянскі палітык, які выступаў супраць абавязковай вакцынацыі дзяцей, захварэў ветраной воспай

Масіміліяна Федрыгу шпіталізавалі.

14 сакавіка італьянскага палітыка Масіміліана Федрыгу шпіталізавалі пасля заражэння ветраной воспай. Да гэтага Федрыга неаднаразова выступаў супраць закона аб абавязковай вакцынацыі дзяцей у Італіі.

Пра гэта паведамляе Цензор.НЕТ са спасылкай на Tjournal.

Закон прынялі яшчэ ў 2017 годзе, але ў дзеянне ён увайшоў у сакавіку 2019 года. Згодна з ім, дзеці да 16 гадоў павінны атрымаць прышчэпкі ад 10 захворванняў (уключаючы ветраную воспу), каб наведваць дзіцячыя садкі і школы. Паход непрышчэпленага дзіцяці ў школу абыдзецца бацькам у 500 еўраў штрафу.

Федрыга, кіраўнік італьянскага рэгіёну Фрыулі-Венецыя Джулія, называў закон «сталінскім». Са слоў палітыка, ён не прыхільнік антыпрышчэпкавага руху, але мяркуе, што бацькоў не трэба прымушаць да вакцынацыі дзяцей. «Я заўсёды казаў, што падтрымліваю прышчэпкі, але з сем'ямі трэба супрацоўнічаць, а не прымушаць іх», - адзначыў Федрыга пасля шпіталізацыі.

«Я бачыў у сацсетках серыю тыповых хейтэрскіх кпінаў і жартаў. Але яны разносяць няпэўную інфармацыю аб тым, як я захварэў. Яны кажуць, што я заразіўся ад сваіх дзяцей, але мае дзеці атрымалі ўсе неабходныя прышчэпкі», - адзначыў Федрыга.