Удзельнікі пратэсту ў Гомелі выклікалі чыноўнікаў на размову

Пратэстоўцы дамагліся грамадзянскага кантролю над шкодным прадпрыемствам.

На сустрэчах, арганізаваных ініцыятыўнай групай жыхароў раёна Навабеліцы, прыйшлі гэтым разам больш за 40 чалавек. Да натоўпу людзей, якім надакучыў тлум і смурод ад фабрыкі «Гомельшпалеры», нават выйшлі прадстаўнікі чынавенства і кіраўніцтва самой фабрыкі, паведамляе «Белсат».

Супрацоўнікі адміністрацыі Навабеліцкага раёна запрасілі тых, хто сабраўся на акцыю, у залу пасяджэнняў, але актывісты адмовіліся туды прайсці, спаслаўшыся на тое, што сустрэча была арганізаваная не чыноўнікамі, а народам - адпаведна гэта чыноўнікі і кіраўнікі фабрыкі павінны самі выйсці да народа, а не наадварот.

- Такая сітуацыя склалася: тры месяцы яны нас не збіралі, а проста ігнаравалі. Праблемы ад фабрыкі мы назіраем ужо год і ўвесь гэты год кіраўніцтва фабрыкі і чыноўнікі нас ігнаравалі.

Дайшло нават да таго, што яны перасталі адказваць на звароты. Мы хадзілі ў гарадскую адміністрацыю, у абласную - і ніводнага пісьмовага адказу пасля гэтых візітаў не атрымалі. У нас у раёне стаіць невыносны гул. Мы напісалі 80 заяў у міліцыю. Людзі проста вар’яцелі ад паху і гоману - і на гэта мы таксама не атрымалі адказаў, - тлумачыць сітуацыю жыхарка Навабеліцы Алена. - Гэтыя чыноўнікі цяпер выйшлі толькі таму, што людзей шмат сабралася. Калі б нас было мала - з намі наогул ніхто не размаўляў бы і ігнараваў як і раней.

Галоўны санітарны лекар вобласці Аляксандр Тарасенка распавёў, што перавышэння нарматываў выкідаў у паветры не было:

- Для таго, каб пераканацца ў існаванні праблемы непрыемнага паху, фабрыкай была запрошаная лабараторыя з Расейскай Федэрацыі, якая мае высветліць: ёсць перавышэнне або не.

У адказ на гэта людзі пачалі абурацца і апавядаць, што замеры непрыемнага паху рабіліся, калі прадпрыемства працавала не на поўную магутнасць і што замеры праводзіліся нават не ў тым баку, куды дзьмуў вецер. Але што да праблемы з шумам, Аляксандр Тарасенка прызнаў, што сапраўды перавышэнне шуму на некаторых вуліцах былі зафіксаваныя ў дзённы і начны час.

Прадстаўнік фабрыкі "Гомельшпалеры" Віктар Кушняроў расказаў, што да правядзення пэўных тэхналагічных дзеянняў і вымераў адзін з сэктараў прадпрыемства быў прыпынены:

- Прадпрыемства прымае вычарпальныя захады для таго, каб выправіць тыя хібы, якія цяпер існуюць і перашкаджаюць людзям жыць. Санітарнай станцыяй была прынятая пастанова аб прыпыненні дзейнасці аднаго з сэктараў фабрыкі ў сувязі з гэтым. Таму на сённяшні дзень гэты сэктар не дзейнічае. Магу сказаць упэўнена - кіраўніцтва фабрыкі працуе над развязаннем гэтых праблем.

У выніку сустрэчы была прынятая супольная пастанова аб магчымасці ажыццяўлення грамадзянскага кантролю падчас правядзення наступных замераў выкідаў з фабрыкі.

- Кіраўнікі санітарных службаў былі сёння літаральна кінутыя на амбразуру да абураных грамадзян, - расказаў сябра аргкамітэта сацыяльнага руху «Разам» Юры Глушакоў. - Фактычна яны нічога новага нам не паведамілі, як заўсёды казалі, што ўсё пад кантролем. Але пад ціскам грамадзян, у якіх ужо накіпела, яны вымушаныя былі пагадзіцца на тое, чаго мы дамагаемся ўжо даўно - на грамадзянскі кантроль за замерамі. Бо на наш погляд тыя замеры, якія праводзіліся раней, былі неаб`ектыўнымі.