Падчас падрыхтоўкі да прыезду Лукашэнкі памёр чыноўнік Шклоўскага райвыканкама
70- 30.03.2019, 9:32
- 109,465
Наведванне Лукашэнкам Магілёўшчыны скончылася масавымі «чысткамі».
За нерэнтабельнасць аграпрадпрыемстваў з пасадаў знятыя высокапастаўленыя чыноўнікі. У публічнай лупцоўцы пацярпелі і адказныя за фермы.
Таксама «Белсату» стала вядома, што падчас падрыхтоўкі да сустрэчы з Лукашэнкам не вытрымала сэрца аднаго з чыноўнікаў Шклоўскага райвыканкама.
Разнос чыноўнікаў на ферме «Сліжы» імгненна разляцеўся на мемы ды цытаты. Малочна-таварны комплекс адносіцца да прадпрыемства «Амкадор-Шклоў» аграхолдынгу «Купалаўскае». Лукашэнка скрытыкаваў усё, што трапіла на вока, а адзін з карпусоў назваў «Асвенцімам». Але ці ўсё так кепска, як казаў і паказваў прэзідэнт? Разбіраемся на месцы.
Чаму не згодныя з крытыкай адказныя фермы і жыхары найбліжэйшай вёскі?
«Гэта карова непасрэдна пасля ацёлу. Карова, якая цялілася, яна страчвае вагу. Адзіны недахоп жа быў у саломе ў нашай. Усё ў асноўным – надоі, рост скаціны, захаванне скаціны – усё ў парадку», – кажа Андрэй Зенкін, начальнік МТК.
«Гэта няправільна, што ён скрытыкаваў. Крыўдна. За комплекс свой крыўдна, вядома. У нас увесь час самы найлепшы комплекс лічыцца, не ведаю», – распавядае аператарка машыннага даення Алена.
«Ведаеце, я калісьці сама трымала карову. Да вясны – яна такая. І наконт таго, што яна худая, – пасля ацёлу ўсе каровы худыя», – дадае жыхарка Анікееўкі Людміла.
На нарадзе аб кадравых пытаннях 28 сакавіка Лукашэнка тлумачыў свой гнеў:
«Я хачу, каб людзі разумелі, што пытанне не столькі ў тым, што там каровы брудныя. Гэта проста людзі не ведаюць, што тыя каровы абышліся краіне на вагу золата».
У суседнюю вёску, дзе размешчаныя фермы эксперыментальнай базы «Спартак», закупалі кароў з Бельгіі. Якія тэхналогіі там? Спарахнелыя сцены карпусоў, шыбы, забітыя звычайнаю плёнкай.
«Калі б да нас прыехаў, а тут не фарбавана, не мазана, не беленае. Ну, таксама даваў бы нам прахвостку, папала б нам таксама добра», – гаворыць рабочы фермы.
Прычынаю адсталасці гаспадарак Лукашэнка лічыць безадказнасць і загадвае перавесці іх, цытата, «на ваенны стан». Яшчэ больш дысцыпліны! Яшчэ больш адказнасці! Такія камандна-адміністрацыйныя метады кіравання ўжо завялі гаспадарку ў тупік.