У калоніі «Ваўчыныя норы» павесіўся зняволены

Хлопец адбываў пакаранне паводле скандальнага артыкула 328 КК.

У папраўчай калоніі №22 паведамілі, што ўсю інфармацыю можна даведацца ў прэс-службе МУС. Яе тэлефоны пакуль недаступныя.

Інфармацыя пра магчымае самазабойства зняволенага з'явілася ў групе «Белорусская тюрьма» раніцай 8 сакавіка. Паводле яе інфармацыі, павесіўся зняволены М.Р, які адбываў пакаранне ў 1-м атрадзе 3-ці-секцыі.

Некалькіх уласных крыніц Радыё Свабода пацвердзілі, што здарэнне сапраўды было.

Пакуль вядома, што хлопец адбываў пакаранне паводле арт. 328 («Незаконны абарот наркатычных рэчываў»). Нібы ў яго і раней былі спробы самагубства, праз чаго ён знаходзіўся на прафілактычным уліку.

Папраўчая калонія №22 знаходзіцца ў Івацэвіцкім раёне. Большасць асуджаных у ёй адбываюць пакаранне паводле «антынаркатычнага» артыкула. У лістападзе 2018 года распаўсюджвалася інфармацыя пра тое, што зняволеныя зладзілі ў ёй пратэсты.