У Камянецкім раёне сто чалавек шукаюць маленькага хлопчыка
8- 11.04.2019, 17:47
- 31,264
Учора ўранку дзіця, якому яшчэ няма і двух, выйшла з дому і не вярнулася.
Хлопчык Ваня Валошын, якому яшчэ няма двух гадоў, выйшаў з дому ў вёсцы Любашках Камянецкага раёна Берасцейскай вобласці ўдзень 10 красавіка. Праз дзень пасля знікнення яго не знайшлі, паведамляе «Радыё Свабода».
Маці Вані звярнулася ў міліцыю а 21:00 10 красавіка. Яна распавяла, што сын выйшаў з дому блізу 15:00 і не вярнуўся, паведамляецца на сайце УУС Берасцейскага аблвыканкама.
Хлопчык быў апрануты ў сіні спартовы швэдар з чырвонымі палосамі на рукавах.
На пошукі дзіцяці адразу накіраваліся міліцыянты, выратавальнікі, памежнікі, вайскоўцы. У Любашкі ўжо накіроўваюцца пошукавыя атрады валанцёраў з розных гарадоў Беларусі. Пошукі прадаўжаюцца дгэтуль.
Як распавёў стараста вёскі Любашак Міхал Кудзелька, у сям'і чацвёра дзяцей, Ваня малодшы. Пераехалі сюды блізу 10 гадоў таму.
Стараста кажа, што пошукі вядуць амаль сто чалавек.
«Хлопцы хадзілі тут, па студням шукалі. Усюдыход прыехаў і паехалі ў лес, на балота. Чалавек сто. Увесь вечар шукалі і цяпер шукаюць. Уся вёска ў машынах», - распавядае Міхаіл Кудзелька.
Вёска Любашкі знаходзіцца ў 20 кіламетрах ад Белавежскай пушчы, да найбліжэйшага лесу блізу 4 кіламетраў.
Тых, хто валодае інфармацыяй пра месцазнаходжанне Вані Валошына, просяць паведаміць на тэлефон 102.