Мухтар Аблязаў: Рэжым Назарбаева можа пасці яшчэ да канца 2019 года

Апазіцыя рыхтуе негвалтоўную рэвалюцыю ў Казахстане.

Грамадзянам Казахстана надакучыла дыктатура. Для змены ўлады апазіцыя рыхтуе негвалтоўны пераварот, заявіў у інтэрв'ю швейцарскаму выданню Tages-Anzeiger (пераклад - «Реалист») экс-міністр энэргетыкі, індустрыі і гандлю, лідар апазіцыйнага руху «Дэмакратычны выбар Казахстана» Мухтар Аблязаў. Цяпер палітык пражывае ў Францыі. Задачай свайго руху ўважае мабілізацыю казахстанцаў і правядзенне масавых вулічных акцый пратэсту. З ягоных слоў, Нурсултан Назарбаеў валодае і кантралюе актывы на суму $200 млрд.

«Ва ўсіх гарадах і раёнах Казахстана ў нас ёсць саюзнікі. Яны гатовыя арганізоўваць дэманстрацыі на месцах. Паводле маёй ацэнкі, дыктатуры больш не хочуць 90% насельніцтва. У нас няма задачы вывесці ўсіх гэтых людзей на вуліцы. Для перамогі над рэжымам дастаткова, каб у акцыях пратэсту ўзялі ўдзел 3-5% насельніцтва. у Арменіі, Грузіі і на Украіне людзям удалося дамагчыся змены рэжыму з дапамогай масавых дэманстрацый. Такім жа чынам гэта адбудзецца і ў Казахстане. Рэжым разваліцца як картачны домік. Рэжым Назарбаева можа абрынуцца яшчэ да канца года», - заяві Аблязаў.

Лідар руху «Дэмакратычны выбар Казахстана» кажа пра поўнае дамінаванне апазіцыі ў сацыяльных сетках. На гэта ўлада адказвае толькі спробамі абмежаваць доступ у інтэрнэт, блакуе сайты і групы ў сацыяльных сетках. «У канцы 2016 года я пачаў палітычнае наступленне ў сацыяльных сетках. У нашых чатах Telegram удзельнічаюць у сотні тысяч людзей. На Youtube мае апошнія відэа набралі больш за мільён праглядаў. Гэта выдатна для краіны з 18-мільённым насельніцтвам», - растлумачыў палітык. Ён дадаў, што вырашальным фактарам для перамогі над сістэмай стане ціск людзей на вуліцах.

Аблязаў уважае, што Назарбаеў пакінуў пасля сябе вакуум улады, які нясе небяспеку для яго клана. З гэтым звязана і пастанова пра перанос даты выбараў прэзідэнта Казахстана з красавіка 2020 года на 9 чэрвеня 2019 года.

У выпадку звяржэння ўлады Аблязаў прапануе стварыць пераходны ўрад тэрмінам на паўгода, які гатовы сам узначаліць. За гэты час ён плануе стварыць новыя партыі і правесці свабодныя выбары ў краіне. Апазіцыянер упэўнены, што «Казахстану трэба дэмакратычна абраны ўрад, а не ўсёмагутны прэзідэнт».