Ніна Багінская - суддзі: Вы для мяне ніхто, я не прызнаю гэты суд
66- 8.04.2019, 14:53
- 94,423
72-гадовую актывістку не змаглі асудзіць за «перашкоды будаўнікам» у Курапатах.
Суд Маскоўскага раёна накіраваў на дапрацоўку пратакол на актывістку Ніну Багінскую - яе вызвалілі. Як стала вядома на судзе, у ізалятары часовага ўтрымання яна абвясціла галадоўку і трымала яе з затрымання 5 красавіка, паведамляе «Радыё Свабода».
Працэс пачаўся пасля абеду 8 красавіка ў судзе Менскага раёна. 72-гадовую актывістку абвінавачвалі ў тым, што яна нібыта замінала будаўнічым працам у Курапатах, калі там знішчалі крыжы і на іх месцы ставілі агароджу. Гэта вызначылі як «дробнае хуліганства» (арт.17.1 КоАП РБ). Таксама Багінскую абвінавачвалі ў «непадпарадкаванні міліцыі» (арт.23.4 КоАП РБ). Пратакол вярнулі ў РУУС «для выпраўлення недахопаў».
Ніна Багінская адмовілася падняцца, калі з'явіўся суддзя.
«Вы для мяне ніхто. Я не прызнаю гэты суд», - заявіла яна.
Суддзя дазволіў Ніне Багінскай удзельнічаць у працэсе седзячы. Яна адмовілася даваць паказанні.
«Не ўважаю гэты суд за справядлівы, - дадала Багінская. - Я Канстытуцыю не парушаю».
Яна адвярнулася ад суддзі, сказаўшы, што не хоча слухаць.
Нагадаем, 5 красавіка падчас абароны народнага мемарыялы ў Курапатах былі арыштаваныя менскім АМАПам з ужываннем сілы Ніна Багінская і Павел Севярынец.