У Казахстане затрыманыя сотні пратэстуючых

У краіне блакуюць сацыяльныя сеткі.

На плошчы «Астана» ў казахстанскім горадзе Алматы затрыманыя не менш за сотню чалавек, якія вечарам 12 чэрвеня выйшлі на несанкцыянаваны мітынг пратэсту. Акцыя была арганізавана прыхільнікамі руху «Дэмакратычны выбар Казахстана» банкіра Мухтара Аблязава. Радыё «Азатык» паведамляе, што паліцыя спачатку затрымлівала старых і жанчын, адпраўляючы іх у аўтазакі на падставе «праверкі дакументаў», а затым усіх, хто ў прынцыпе набліжаўся да плошчы.

За апошнія некалькі дзён гэта ўжо трэцяе буйное затрыманне людзей, якія пратэстуюць супраць вынікаў прэзідэнцкіх выбараў (на іх 9 чэрвеня з вынікам 70,96% перамог Касым-Жомарт Такаеў), а таксама супраць рэжыму першага прэзідэнта Нурсултана Назарбаева, які цяпер займае пасаду кіраўніка Рады бяспекі. 9 і 10 чэрвеня масавыя затрыманні адбыліся ў Алматы і Нур-султане. МУС кажа пра 700 затрыманых, актывісты і праваабаронцы мяркуюць, што колькасць можа перавысіць 5000 чалавек. Вядома, што многіх затрыманых вывозяць з Алматы і Нур-Султана ў суседнія гарады праз недахоп месцаў у аддзелах паліцыі.

Акрамя таго, у рэспубліцы з 10 чэрвеня назіраюцца перабоі ў працы сацыяльных сетак. З абеду 11 чэрвеня па вечар 12 чэрвеня ў краіне адключаныя WhatsApp, Facebook, Instagram, Telegram, яны даступныя толькі пры ўключэнні VPN. На прэс-канферэнцыі 10 чэрвеня Касым-Жомарт Такаеў заявіў, што «не ў курсе» блакаванняў. Адзначым, што адключэнне сацыяльных сетак практыкуецца ўладамі краіны рэгулярна: да прыкладу, 9 траўня значная частка мэсэнджараў таксама была недаступная на тэрыторыі рэспублікі.