Зміцер Бандарэнка: Алег Бябенін змагаўся за нашу агульную перамогу
3- 14.06.2019, 20:17
- 7,884
Каардынатар «Еўрапейскай Беларусі» - пра заснавальніка сайта Charter97.org.
Сёння заснавальніку сайта Charter97.org Алегу Бябеніну споўнілася б 45 гадоў.
Каардынатар грамадзянскай кампаніі «Еўрапейская Беларусь» падзяліўся ўспамінамі пра Алега Бябеніна:
- Алег - гэта мой вельмі блізкі баявы таварыш і паплечнік. Напэўна, нават не рызыкну сказаць, што гэта мой вельмі блізкі сябар, таму што пры ўсёй сваёй таварыскасці і ўнікальных камунікатыўных здольнасцях Алег напраўду быў такі «рэччу ў сабе» і досыць замкнёным чалавекам.
Але мы з ім зрабілі вельмі шмат разам і, можа быць, Беларусь сёння яшчэ не вольная таму, што Алега няма з намі. Прынамсі тое, што актыўнасць супраціву беларусаў апошнім часам стала меншай, на мой погляд, звязана ў тым ліку і са смерцю Алега.
У турме КДБ гэбісты, што дапытвалі мяне, казалі: вы ж разумееце, што Алег Бябенін памёр не проста так. Калі я спытаў: «Вы прызнаецеся ў яго забойстве?», - яны адказалі: «Гэта не мы».
Хачу сказаць: гэту справу мы расследуем. Гэта абавязкова адбудзецца.
Яшчэ хачу сказаць пра Алега, што ён сапраўды быў адным з лідараў беларускага супраціву. Калісьці ў нас з ім была размова, ён казаў: «Я - расеец, я сын савецкага афіцэра і пабойваюся, што калі нацыяналісты ў Беларусі прыйдуць да ўлады, то я тут ніколі не буду сваім». Я адказаў: «Алег, гэта поўнае глупства, сітуацыя ў Беларусі такая, што калі ты захочаш быць беларусам і лідарам беларускага супраціву, то ты ім станеш».
І ён гэта прыняў - і гэта стала яго жыццём. Ён разумеў, што гэта яго краіна, гэта яго барацьба - і змагаўся за нашу агульную перамогу.
Напэўна, сваёй задачай у памяць пра яго я бачу дасягненне нашых мэтаў, дзеля якіх Алег змагаўся і жыў - зрабіць Беларусь свабоднай і незалежнай і вярнуць свабодную, паўнавартасную журналістыку ў нашу краіну.