20 лiпеня 2019, Субота, 4:56
Мы ў адной лодцы
Рубрыкі

Пара спыняць гульні з дыктатарамі

61
КРЫНІЦА: RFL/RE

Не бярыце ўдзелу ў брудных палітычных падтанцоўках, цана якіх - чалавечае жыццё.

У Беларусі чарговым разам прывялі ў выкананне смяротны прысуд. Цяперашні любімчык Еўропы (таму што не Пуцін) і Украіны (таму што дарогі добрыя) загадаў пакараць смерцю двух чалавек напярэдадні Еўрапейскіх Гульняў. Што такое «Еўрапейскія Гульні» недаступна майму ўяўленню. Навошта яны патрэбныя спартоўцам? Навошта іх настойліва праводзяць у дыктатарскіх краінах? Чаму пасля Азербайджана іх планавалі правесці ў Расеі, а калі допінг-скандал зрабіў гэта немагчымым, з радасцю ўзнагародзілі суседняга князька Лукашэнку?

Спартсменаў запрашаюць пабегаць, паскакаць у краіне, дзе людзей забіваюць.

Незразумелыя Еўрапейскія Гульні паскорылі пакаранне прысуджаных у Беларусі. Пакаралі смерцю забойцаў, гэта праўда, але іх не судзілі справядлівым судом, таму што такога няма ў Беларусі. Іх забілі, але не пакаралі. Прынамсі адзін з іх звярнуўся ў ААН са скаргай на прысуд. У такіх выпадках у дзяржавах з дзейнай судовай сістэмай прысуд адкладаецца. Не адклалі, бо трэба было паказваць еўрапейцам, хто гаспадар у Беларусі, і што гаспадар проста любіць забіваць людзей. Хобі ў яго такое. Цяперашняе МЗС вам гэта папросту растлумачыць у рамках «дыялогу з ЕЗ у правах чалавека».

А яшчэ тут з дапамогай Захаду, які даслаў свайго прадстаўніка Рональда Ноўбла з Інтэрпола, каб дапамагчы апраўдаць пакаранні, забітых Канавалава і Кавалёва за выбух у метро, да якога яны не мелі дачынення. А колькі яшчэ выпадкаў дзяржаўных забойстваў адбылося, пра якія мы не ведаем?

Затое хутка свята, тыя самыя Еўрапейскія Гульні, у якія Еўропа гуляе з дыктатарамі, ды яшчэ і грошы на гэта вылучае. Правядзенне гэтых гульняў у Беларусі ўхвалілі 50 дзяржаў. У 49 з іх, уключаючы Расею, смяротнае пакаранне скасаванае. Не скасаванае яно толькі ў Беларусі. Ведаеце чаму? Таму што гэта не дазваляе зрабіць Лукашэнка. Не верце таму, што апытанні паказваюць падтрымку смяротнага пакарання. Па-першае, у Беларусі ўжо даўно немагчыма правесці апытанне, па-другое, гэта любімая забаўка Лукашэнкі - смяротнае пакаранне.

Ва ўсіх 50 краінах (так-так пяцідзесяці, уключаючы Беларусь) ішлі і ідуць актыўныя кампаніі за скасаванне смяротнай кары. Выдзяляюцца вялікія грошы, каб людзям тлумачылі, як дрэнна караць смерцю субратоў і сусясцёр (будзем паліткарэктнымі). Выпускаюцца даклады, фіксуюцца выпадкі пакаранняў смерцю, друкуюць плакаты і ўлёткі, выпускаюць прыгожыя тэніскі.

Можа, проста, раз’юшыўшыся, праваабарончыя арганізацыі не заўважаюць, што смяротнае пакаранне ў Еўропе існуе толькі ў Беларусі. У той самай Беларусі, у якой вось-вось пачнуцца Еўрапейскія Гульні. У той самай Беларусі, у якой Лукашэнка наўмысна загадаў прывесці смяротны прысуд у выкананне напярэдадні, а не пасля гэтых гульняў.

Спытаеце для чаго? Ды для таго, каб у наступны раз, калі яму Еўропа будзе пагражаць пальчыкам што да правоў чалавека ці казаць «ай-я-яй», навошта ж людзей забіваць, ён мог спакойна сказаць: «Так, я іх забіў, а вы праз пару дзён прыехалі са мной гэта забойства адсвяткаваць». І Еўропа пагодзіцца: сапраўды, навошта пра непрыемнае?

Дык вось, вернемся да «магутных» кампаній скасавання смяротнага пакарання і фінансаў, што выдзяляюцца на іх. У мяне ёсць цалкам бясплатная парада што да самай эфектыўнай кампаніі за скасаванне смяротнага пакарання, якая не будзе каштаваць ні капейкі: еўрапейскія дзяржавы, якія скасавалі смяротнае пакаранне ў сваіх краінах, не прыязджайце ў Беларусь. Не ўдзельнічайце ў брудных палітычных падтанцоўках, цана якіх - чалавечае жыццё. Папрасіце сваіх спартоўцаў - а гэта ж вы фінансуеце іх паездкі на дыктатарскія гулянкі, - нікуды не ездзіць, а рыхтавацца да сапраўдных спаборніцтваў. Паверце, спартоўцы вам толькі дзякуй скажуць. Я вось зуб даю, што ніхто не ўспомніць ніводнага пераможцу Еўрапейскіх гульняў у Баку, акрамя саміх пераможцаў, і тое, калі ім не сорамна будзе.

Не прыніжайце спартсменаў. Не заахвочвайце дыктатараў.

Я не люблю тыкаць тэгамі ў сваіх знаёмых і сяброў, таму проста прашу: давайце перастанем заахвочваць дыктатараў, давайце абаронім спартоўцаў ад прыніжэння, давайце рэальна скасуем смяротнае пакаранне ў Беларусі. Гэта вельмі лёгка зрабіць.

Бярыце гэты мой тэкст, распаўсюджвайце яго, лепш сваімі словамі, у дачыненні да сваёй краіны. Перакладайце яго на іншыя мовы. Звяртайцеся да сваіх урадаў, парламентарыяў з заклікам спыніць удзел спартоўцаў у гульнях у краіне, дзе яшчэ існуе смяротнае пакаранне і дзе толькі што прывялі ў выкананне смяротны прысуд, спецыяльна, каб зрабіць вас саўдзельнікамі.

Андрэй Саннікаў, каардынатар грамадзянскай кампаніі «Еўрапейская Беларусь», Фэйсбук