17 верасня 2019, aўторак, 23:02
Мы ў адной лодцы
Рубрыкі

Стала вядома, за што затрымалі кіраўніка Салігорска

16
Стала вядома, за што затрымалі кіраўніка Салігорска
АЛЕГ ПАСКРАБКО
ФОТА: CTV.BY

У справе фігуруе незаконнае ўзнагароджанне на 2000 еўраў.

Старшыню Салігорскага райвыканкама Алега Паскрабка затрымалі за лабіяванне інтарэсаў замежнай кампаніі ў час яго работы першым намеснікам міністра ЖКГ. Пра гэта tut.by паведаміла Вераніка Пасмецьева, старшы оперупаўнаважаны ў асабліва важных справах ГУБЭЗ МУС.

Паводле звестак МУС, з'яўляючыся асобай, якая займае адказнае становішча, ён лабіяваў інтарэсы замежнай камерцыйнай структуры ў пытаннях жыллёва-камунальнай гаспадаркі.

«Некалькі гадоў, займаючы пасаду першага намесніка міністра ЖКГ, з карыслівай і асабістай зацікаўленасці неаднаразова перавышаў службовыя паўнамоцтвы і атрымліваў ад прадстаўніка гэтай камерцыйнай структуры незаконныя грашовыя ўзнагароды. Іх сума склала 2 тысячы еўраў», - распавяла Вераніка Пасмецьева.

Яна таксама адзначыла, што прыдуманы падазраваным спосаб атрымання грошай быў вельмі хітры і ў інтарэсах следства пакуль не выдаецца.

У дачыненні да чыноўніка распачатая крымінальная справа паводле ч. 3 арт. 426 (Перавышэнне ўлады або службовых паўнамоцтваў). Яму пагражае да 10 гадоў пазбаўлення волі.

Нагадаем, 18 чэрвеня стала вядома пра затрыманне 39-гадовага кіраўніка Салігорскага раёна Алега Паскрабка.

З 2009 да 2012 года ён працаваў на кіроўных пасадах у адміністрацыі Фрунзенскага раёна г. Мінска, з 2012 да 2015 год узначальваў адміністрацыю Цэнтральнага раёна Менска, з 2015 да 2017 га быў першым намеснікам міністра жыллёва-камунальнай гаспадаркі.

Старшынёй Салігорскага раённага выканаўчага камітэта Паскрабка прызначылі 10 жніўня 2017 года. На гэтай пасадзе ён змяніў затрыманага паводле падазрэння ў атрыманні хабару Аляксандра Рымашэўскага.