На «Бабруйскаграмашы» ўводзяць прымусовую працу ў выходныя
8- 21.06.2019, 20:55
- 18,762
Работнікаў прадпрыемства, без іх згоды, прымушаюць працаваць у выходны дзень.
Кіраўніцтва «Бабруйскаграмаша» выдала загад аб пераносе працоўнага дня з пятніцы 4-га кастрычніка на бліжэйшую суботу - 22-га чэрвеня. Пры гэтым згоду работнікаў ніхто не пытаў, паведамляе «Бобруйский курьер».
Перанос працоўнага дня ініцыяваў генеральны дырэктар. Цікава, што дакумент падпісалі (у тым ліку) кіраўнік юрыдычнага аддзела прадпрыемства і старшыня прафкама. Прычым у ім не пазначана, што працоўныя гадзіны ў суботу будуць аплачвацца па павышаным (падвойнаму) тарыфе і няма спасылак на заканадаўчыя акты.
Абураныя працаўнікі звярнуліся ў аддзел кадраў з просьбай патлумачыць ім, на падставе якога закону іх абавязваюць выйсці на працу ў выходны дзень, але выразнага адказу не атрымалі.
Пасля таго, як дзеянні кіраўніцтва «Бабруйсаграмаша» атрымалі агалоску ў СМІ, яшчэ адзін запланаваны перанос працоўнага дня - з 7-га кастрычніка на суботу 29-га чэрвеня, адміністрацыя прадпрыемства стала ўжо ажыццяўляць азнаямленне пад подпіс работнікаў.
Каментар незалежнага юрыста:
- Перанос працоўных дзён з'яўляецца прэрагатывай Савета Міністраў. Ён узгадняецца з кіраўніком дзяржавы. Перанос працоўных дзён на выхадныя дапускаецца на прапанову наймальніка і толькі са згоды работніка або на ініцыятыву работніка са згоды наймальніка і, згодна з працоўным кодэксам, - аплата ў такіх выпадках ажыццяўляецца па падвойным тарыфе. Па заканадаўстве, наймальнік мае права прыцягнуць работніка працаваць у выходны дзень толькі ў выключных выпадках, напрыклад, для прадухілення катастрофы, вытворчай аварыі, выканання работ, неабходных для неадкладнай ліквідацыі іх наступстваў, пры стыхійным бедстве, прадухіленні няшчасных выпадкаў...
У Беларусі праца з’яўляецца не прымусовай, а добраахвотнай. На жаль, «афіцыйныя» прафзвязы самаўхіліліся ад сваіх непасрэдных абавязкаў, і замест абароны наёмных работнікаў абараняюць інтарэсы наймальнікаў, пра што, дарэчы, сведчыць і загад аб пераносе працоўнага дня на «Бабруйскаграмашы», падпісаны старшынёй прафкама прадпрыемства...