Андрэй Касціцын: Пастараемся, каб менскае «Дынама» выйшла ў плэй-оф КХЛ

Нападнік заключыў новы кантракт з «зубрамі».

Нападнік Андрэй Касціцын пракаментаваў пастанову застацца ў менскім «Дынама» і выказаў надзею, што ў наступным сезоне каманда выйдзе ў плэй-оф КХЛ.

- Як настрой?

- Усё добра дзякуй. Канцоўку сезону прапусціў праз траўмы, але гэта ззаду. Ужо паўнавартасна трэніруюся, выйшаў на лёд. Нічога не турбуе. З аптымізмам гляджу наперад.

- Што скажаш пра свой першы сезоне ў «Дынама»?

- Вядома, дрэнна, што не трапілі ў плэй-оф. Увесь чэмпіянат былі перапады. Трэба гуляць больш стабільна. Мала закідвалі, не атрымлівалася большасць, хоць ад гульні ў няроўных складах залежыць вельмі многае. Калі б недзе была лепей рэалізацыя лішняга, то і вынік некаторых матчаў быў бы іншы. Думаю, усе правялі аналіз і паспрабуюць не дапускаць леташніх памылак. Пачнецца перадсезонка, і будзем працаваць над гульнёй «пяць на пяць», большасцю і меншасцю.

- «Дынама» пакінулі трое маладых беларусаў, прычым Буйніцкі закінуў некалькі шайбаў з тваіх перадач.

- Хакей - камандная гульня. Не стаў бы кагосьці выдзяляць. Так, добра з Дзімам разумелі адзін аднаго, стваралі шмат момантаў. Нешта рэалізавалі. А так я рады за ўсіх хлопцаў. Яны доўга гулялі за «Дынама». Раз з'явіўся шанец паспрабаваць сілы ў іншым клубе, то чаму б і не? Тым больш, новыя каманды Крыса, Буя і Ліса заўсёды змагаюцца за высокія месцы.

- Сваёй статыстыкай застаўся задаволены?

- Усё адносна. Галоўнае, паўтаруся, - каб не было перападаў у гульні каманды, у тым ліку па ходзе асобнага матчу. Тады прыйдзе поспех, і лічбы будуць больш прыемныя.

- Што думаеш пра новы сезон?

- Пакуль рана нешта казаць, склад толькі фармуецца. Не вядома, якія будуць легіянеры. Думаю, у многіх беларусаў будзе стымул паказаць сябе. Магу толькі сказаць, што пастараемся, каб «Дынама» выйшла ў плэй-оф. Хочацца гуляць больш стабільна. Хочацца і пазітыўнай атмасферы ў распранальні. Калі перамагаеш, гэта заўсёды падымае камандны настрой, - цытуе Касціцына-старэйшага прэс-служба «зуброў».