«240 рублёў атрымліваем, хто пойдзе на тваю рыбалку?»
53- 9.06.2019, 16:21
- 26,300
Арандатар вясковага возера хоча браць плату з мясцовых.
На Гомельшчыне - чарговы канфлікт мясцовых жыхароў і арандатара вадаёма. Дарослых і дзяцей з аграгарадка Матневічаў Чачэрскага раёна цяпер пускаюць да вясковага возера толькі за грошы - за дзень рыбалкі трэба аддаць 14 рублёў. Платным зрабілі было і адпачынак на беразе вадаёма. Людзі абурыліся, піша tut.by.
Пра тое, што іх возера здалі ў арэнду, жыхары Матневічаў, кажуць, даведаліся выпадкова.
- Дзеці пайшлі купацца, а іх не пусціў незнаёмы мужчына. Выявілася, што арандатар. Потым на вадаём забаранілі хадзіць і рыбакам. Сказалі, што цяпер наша возера не наша, а прыватная ўласнасць тэрмінам на 25 гадоў, - уздыхаюць мясцовыя жанчыны пад клубам. Тут яны чакаюць «вялікае начальства з раёна: старшыня райвыканкама абяцаў прыехаць і ва ўсім разабрацца.
«Унукі просяцца: «На рэчку, на рэчку!» Што нам ім цяпер адказаць?»
Праз паўгадзіны ў мясцовым клубе сабралася поўная актавая зала. Людзям было што сказаць кіраўніцтву раёна і арандатару.
«Чаму ў насельніцтва ніхто не спытаў?», «Чаму без нас гэтую кашу заварылі?», «Чаму не ўзгаднілі?» - ляцяць з залы гнеўныя пытанні.
- Азёры сёння ва ўсёй Беларусі здаюцца ў арэнду, гэта не мы прыдумалі. Пытанне аб здачы вашага возера ўздымалася на сесіі раённага савета дэпутатаў і там яго зацвердзілі - гэта значыць, гэтае пытанне не патрабавала грамадскага абмеркавання, - адказваюць чыноўнікі.
Людзей такі адказ не задавальняе.
- Стомленыя трактарысты пасля працы ехалі і да ночы рабілі гэтае возера, мы яго самі зарыблялі, а цяпер і схадзіць на яго не можам! - абураюцца мясцовыя.
- Я побач жыву, пасля сена нават абмыцца цяпер схадзіць не магу!
- Унукі прыязджаюць, просяцца: «На рэчку, на рэчку!» Што нам ім цяпер адказаць?
Пасля паўтары гадзіны гарачых дэбатаў і абмеркаванняў арандатар паабяцаў не браць з мясцовых плату за адпачынак на возеры, але з адной умовай - што людзі не будуць на вадаёме смеціць. Таксама паабяцаў зрабіць зніжку для мясцовых рыбакоў - знізіць кошт туру з 14 да 12 рублёў. Гэта выклікала новы шквал эмоцый.
- Ды мы 240 рублёў атрымліваем, хто ж пойдзе на тваю рыбалку? - абураюцца людзі і патрабуюць знізіць кошт як мінімум напалову.
Выдаткаваў не адну тысячу, але прыбытку пакуль не атрымаў
У арандатара Уладзіміра на такія патрабаванні свая праўда і свая бухгалтэрыя.
- Кілаграм маляўкі каштуе 5 рублёў. А я толькі за адзін раз 165 кг набыў і пяць асобін матак, - мужчына вядзе нас уздоўж вадаёма, паказвае лаўкі, столікі і нават туалет: усё, кажа, зрабіў сам.
За час арэнды, кажа Уладзімір, ён ужо тройчы зарыбляў вадаём амурам і таўсталобікам. Выдаткаваў, сцвярджае, не адну тысячу, але прыбытку пакуль не атрымаў ні капейкі.
- Каб вы бачылі тое возера два гады таму, калі я яго браў. Усё зарасло. Я выкасіў берагавую лінію, прыбраў трыснёг, толькі смецця паўтары машыны вывез адгэтуль. Шлюзы згнілі - абклаў іх цэлафанам, мяшкамі - вычысціў усе, і стала падымацца вада. Цяпер тут 3 метры глыбіня, а раней была паўтара.
Арандатар прызнаецца, што, вядома, баіцца, што людзі не пойдуць да яго на рыбалку, але і знізіць яе кошт ён не можа - нявыгадна.
Ёсць у Матневічах яшчэ адно возера - проста ў цэнтры вёскі. Бясплатнае. Але берагі зараслі, рыбы няма, дно, успамінаюць людзі, чысцілі апошні раз 40 гадоў таму. Яго ніхто не хоча ні браць у арэнду, ні прыводзіць у парадак бясплатна. Улады кажуць: гадзіна працы адной адзінкі спецтэхнікі каштуе 30 рублёў. Колькі трэба такіх гадзін - ніхто і не лічыў. Што толку, калі ў бюджэце раёна на гэта грошай няма, а такіх азёр у раёне - дзясяткі.