Ва Украіне суд зняў арышт з маёмасці Ігара Каламойскага

З-пад арышту выведзеныя 415 аб'ектаў нерухомасці.

Пячэрскі райсуд г. Кіева задаволіў хадайніцтва ТАА "Прыватофіс" і зняў арышт з 415 аб'ектаў нерухомасці кампаніі Ігара Каламойскага (зямельныя надзелы, нежылыя, офісныя памяшканні ў розных рэгіёнах Украіны), на якія ў 2017 годзе быў накладзены вызначэннем гэтага ж суда з хадайніцтва Генпракуратуры ў рамках расследавання выдачы Прыватбанкам крэдытаў для звязаных асобаў на невыгодных умовах, што прывяло да ўзнікнення запазычанасці юрыдычных асобаў перад банкам на 373 млн грн. Як паведамляе Finbalance, пастанова была прынятая яшчэ 5 ліпеня, паведамляе zn.ua.

Суд канстатаваў, што да ТАА "Прыватофіс" "не можа быць ужыты захад крымінальна-прававога характару паводле прыкметаў крымінальнага правапарушэння, прадугледжанага ч. 5 арт. 191 КК Украіны, у тым ліку, канфіскацыя", а "арышт быў накладзены без доказаў сувымернасці кошту нерухомай маёмасці, на якую быў накладзены арышт, з памерам шкоды, нанесенай крымінальным правапарушэннем".

Паводле судовых матэрыялаў Прыватбанк даў крэдыт для ТАА "Прыватофіс". Пры гэтым у заклад для фінустановы былі перададзеныя дзелі ў статутным капітале кампаніі-пазычальніцы, уладальнікамі якіх з'яўляюцца ў тым ліку ТАА "Тайлон", ТАА "Эл Ці Груп", ТАА "Агенцтва Новы свет", ТАА "Зернепастаўкі-М".

Цяпер Гассуд Днепрапятроўскай вобласці разглядае справу паводле пазову Прыватбанка ў згаданых кампаній, а таксама ТАА "Кандэла", ТАА "ОПФ", ТАА "Элара", ТАА "Камунальнае абслугоўванне дамоў" пра зварот спагнання на іх дзелі ў статутным капітале ТАА "Прыватофіс" у кошт выплаты запазычанасці ТАА "Прыватофіс" памерам 689 млн грн. Акрамя гэтага, Гассуд Днепрапятроўскай вобласці разглядае яшчэ шэраг пазоваў Прыватбанка да ТАА "Прыватофіс" пра спагнанне запазычанасці ў крэдытных дамовах ад 17.12.2008 на суму большую за 500 млн грн.

Аднак на гэты момант разгляд гэтых спрэчак суды прыпынілі да вынясення пастановы паводле справаў, у якіх Прыватбанк просіць суддзяў прызнаць несапраўдным аднабаковую ўгоду ў форме заявы ТАА "Прыватофіс" пра залік сустрэчных аднастайных патрабаванняў.