Як арабскія шэйхі атрымалі тысячы гектараў беларускай зямлі

Адзін з участкаў знаходзіцца нават не ў арэндзе, а ва ўласнасці.

Нядаўна віцэ-прэм'еру Уладзіміру Дворніку было зададзенае пытанне аб эканамічнай мэтазгоднасці выдзялення ўчасткаў Катару і ААЭ ў Менскай вобласці, але канкрэтнага і разгорнутага адказу не атрымалі дагэтуль.

Tut.by стала вядома, на якіх менавіта ўмовах гэтая зямля выдзеленая арабскім дзяржавам і якая для іх усталяваная арэндная плата. Як высветлілася, адзін з участкаў перададзены ва ўласнасць.

Нагадаем, у 2013 годзе на падставе дакументаў з грыфам «для службовага карыстання» дзяржаве Катар на 99 гадоў вылучылі тры ўчасткі зямлі. Так, 25 гектараў ля Дубровенскага вадасховішча аддалі пад рэзідэнцыю, а два ўчасткі лясоў у Лагойскім раёне агульнай плошчай амаль 25 квадратных кіламетраў - пад паляўнічыя ўгоддзі. Выпадкова высветлілася, што ў Лагойскім раёне размяшчаецца і ўчастак, выдзелены для ААЭ.

У 2017 годзе журналісты праехаліся па раёнах, дзе размешчаны арабскія ўгоддзі, і пагутарылі з мясцовымі. Тады тэрыторыі былі абгароджаныя, але вялікага руху там не было. Затое на ўчастку ААЭ на ўсю моц гарэзавалі высакародныя алені. Паглядзім, на якіх умовах гэтая зямля перададзеная арабскім дзяржавам. Усе межы на мапах будуць пазначаны прыкладна.

Два ўчасткі Катара.

Першы ўчастак плошчай 1566 гектараў, або блізу 15 квадратных кіламетраў, знаходзіцца ў раёне пасёлка гарадскога тыпу Плешчаніцы Лагойскага раёна.

Ён прызначаны для будаўніцтва і эксплуатацыі паляўнічых вальераў і аб'ектаў, неабходных для іх абслугоўвання.

Гэтая зямля ў 2013 годзе перададзеная ў арэнду Катару на 99 гадоў. Ад імя Катара ў гэтых праваадносінах удзельнічае ТАА «Інвестыцыйная кампанія «Сокал», якая пабудавала на праспекце Пераможцаў аднайменны комплекс з пяцізоркавым гатэлем «Мэрыёт».

Другі катарскі ўчастак для тых жа мэт размешчаны недалёка - каля вёсак Пагост і Леснікі таго ж Лагойскага раёна.

Ён займае плошчу прыкладна ў 2330 гектараў, або блізу 23 квадратных кіламетраў. Гэтая зямля перададзеная Катару паводле той жа дамовы арэнды, што і першая.

І што цікава, не бясплатна. Так, на момант заключэння дамовы гадавая арэндная плата за два ўчасткі агульнай плошчай амаль 3,9 тысячы гектараў складала блізу 280,6 тысячы рублёў. Як паведаміла інфармаваная крыніца, у 2016 годзе да стаўкі арэнднай платы быў ужыты каэфіцыент падвышэння 2,5 і цяпер яна складае блізу 701,5 тысячы рублёў у месяц.

Трэці ўчастак Катара. Высвятляецца, зямля ва ўласнасці

Трэці ўчастак Катара займае 25 гектараў і размешчаны на беразе Дубровенскага вадасховішча ў Смалявіцкім раёне. Зямля прызначаная для будаўніцтва і эксплуатацыі рэзідэнцыі гэтай дзяржавы.

Што цікава, у 2013 годзе гэты ўчастак перададзены ва ўласнасць Катара. Права ўласнасці зарэгістраванае пастановай ДСК Мінаблвыканкама.

Участак ААЭ. І рэзідэнцыя, і вальеры

Участак Аб'яднаных Арабскіх Эміратаў займае плошчу 3210 гектараў, або блізу 32 квадратных кіламетраў. Ён знаходзіцца недалёка ад вёскі Зембін Барысаўскага раёна.

Участак прызначаны для будаўніцтва і эксплуатацыі рэзідэнцыі, паляўнічых вальераў, штучных вадаёмаў, паляўнічых домікаў і аб'ектаў, неабходных для іх абслугоўвання, а таксама аб'ектаў інжынернай і транспартнай інфраструктуры.

Гэтая зямля ў 2014 годзе перададзеная ААЭ ў арэнду на 99 гадоў. І зноў такі - не бясплатна. Гадавая арэндная плата з 2018 года складае 885 583,59 беларускага рубля.