Міхаіл Хадаркоўскі стварыў групу дапамогі грамадзянскай супольнасці ў Расеі

Таксама ў Расеі з'явіцца спіс чыноўнікаў, якія маюць дачыненне да арганізацыі палітычных рэпрэсій.

У заяве, апублікаванай у Facebook расейскага бізнэсоўца і палітычнага дзеяча Міхаіла Хадаркоўскага, гаворыцца, што група будзе аказваць падтрымку палітычным ініцыятывам у сферы канстытуцыйных акцый прамога дзеяння, сярод іх мітынгі, шэсці, пікеты, страйкі, піша kasparov.ru.

Хадаркоўскі таксама мае намер весці «спіс Шаўчэнкі» (паводле імені актывісткі «Адкрытай Расеі» Анастасіі Шаўчэнкі, якая знаходзіцца пад хатнім арыштам) - спіс чыноўнікаў, якія маюць дачыненне да «арганізацыі палітычных рэпрэсій», і аказваць прававую падтрымку расейцам, якім давялося пакінуць краіну пад пагрозай крымінальнага пераследу «за прававыя палітычныя дзеянні». Яшчэ адна з задач групы - дамагацца ад замежных палітыкаў і бізнэсоўцаў асуджэння парушэння правоў чалавека ў Расеі.

Прадпрымальнік заклікаў усіх зацікаўленых грамадскіх дзеячаў, палітыкаў і прадстаўнікоў грамадзянскай супольнасці прыняць удзел у працы групы. Дзейнасць групы будзе публічнай, адзначыў ён, але імёны яе ўдзельнікаў не будуць раскрывацца, калі гэта будзе несці для іх істотную рызыку. Фінансавацца новая структура будзе выключна за кошт сродкаў расейцаў, падкрэсліў заснавальнік «Адкрытай Расеі».