Чэмезаў-джэт

Уся сутнасць цяперашняга праўлення РФ - пускаць пыл у вочы

Кіраўнік «Растэха» Сяргей Чэмезаў заявіў у інтэрв'ю РБК аб стратным дзяржаўным праекце вытворчасці самалёта Sukhoi Superjet 100:

«Што тычыцца рэбрэндынгу - мажліва, сапраўды трэба зрабіць. Тым больш, можна зрабіць нашу расейскую назву».

У гэтай заяве ўся сутнасць цяперашняга праўлення - пускаць пыл у вочы, займацца піярам, а не справай, піша тэлеграм-канал «СерпомПо».

Відавочна, што за 20 гадоў неабмежаванага кіравання Пуціна, пры магчымасці выкарыстоўваць велізарныя рэсурсы, прызначаць якіх заўгодна кіраўнікоў, на сваё меркаванне будаваць дзяржкампаніі, не ўдалося стварыць ніводнага грамадзянскага самалёта, здольнага канкураваць з заходнімі машынамі.

Нават і гэты самы Sukhoi Superjet 100, які, дай Бог, напалову збіраецца з расейскіх камплектуючых, праваліўся - не патрэбны ў свеце нікому, а ў Расеі яго запіхваюць ціскам адміністрацыі.

І вось Сяргей Чэмезаў кажа пра рэбрэндынг, сэрвісную кампанію з «Аэрафлотам» і іншую лухту замест таго, каб прызнаць, што праект стратны. І сцвярджаць, што праблемы з Sukhoi Superjet 100 - гэта «дзіцячыя хваробы, яны адпрацоўваюцца і з часам пройдуць».

Таварыш Чэмезаў, гэты самалёт вырабляецца больш за 10 гадоў, з 2008 года, якія яшчэ «дзіцячыя хваробы»? Гэта старэчы радыкуліт!

Стратны праект, які не мае шанцаў стаць прыбытковым, трэба закрываць. Але як жа можна? Трэба ж карміць дзяржкампанію!

Таму застаецца толькі шлях рэбрэндынгу - змены імя, пошуку чароўнага спалучэння гукаў расейскай мовы. «Мы варажылі, мы вызначалі, як жа нам кацянят назваць?».