У Бураціі супрацоўнік Расгвардыі заклікаў калег не затрымліваць мірных мітынгоўцаў

Ён запісаў адмысловы відэазварот.

У Бураціі супрацоўнік Расгвардыі запісаў відэазварот да калег, у якім заклікаў «не выконваць заведама злачынных загадаў» і не затрымліваць удзельнікаў мірных акцый пратэсту. Аўтарам роліка выступіў стралок атрада ваенізаванай аховы ФГУП «Ахова» Віктар Харжыраў, паведамляе «Эхо Москвы».

«Мы супраць рэпрэсій, якія ахапілі наш горад. Свабоду палітвязням! Затрыманні былі ўсе незаконнымі! Спадзяюся, што здаровы сэнс пераможа. Улада павінна павярнуцца да народа», - кажа Віктар Харжыраў.

Рэдакцыі «Сибирь.Реалии» Харжыраў заявіў, што звальненнем яму пакуль не пагражаюць, калегі адрэагавалі на ягоны зварот станоўча. У прэс-службе рэгіянальнай управы Расгвардыі пакуль не каментуюць відэа.

Нагадаем, ва Улан-Удэ з 9 верасня праходзяць стыхійныя акцыі пратэсту, удзельнікі якіх патрабуюць скасавання вынікаў выбараў мэра горада і дэпутатаў гарсавета - камуністы заявілі пра шматлікія парушэнні.