Ізраіль галасуе другі раз за пяць месяцаў

У лідарах апытанняў дзве партыі.

У Ізраілі праходзяць другія за апошнія пяць месяцаў усеагульныя выбары. Прэм'ер-міністр Біньямін Нетаньяху прызначыў паўторнае галасаванне пасля таго, як пасля вясновых выбараў не здолеў сфармаваць кіроўную кааліцыю, паведамляе BBC.

Паводле апытанняў грамадскай думкі, прыкладна аднолькавая колькасць выбарнікаў падтрымліваюць ягоную партыю "Лікуд" і апазіцыйную партыю "Кахоль-лаван", якую ўзначальвае былы кіраўнік генштаба Бені Ганц.

Паколькі за ўсю гісторыю існавання Ізраіля ні адна партыя ні разу не набрала большасці месцаў у Кнэсеце і краінай заўсёды кіравалі кааліцыі, то цяпер уся ўвага звернутая на тое, колькі менавіта галасоў і дэпутацкіх месцаў атрымаюць менш буйныя партыі.

Перамовы паміж партыямі пра стварэнне новай кааліцыі пачнуцца неадкладна пасля заканчэння галасавання ўвечары ў аўторак, пасля таго як будуць апублікаваныя экзітполы.

Чаму датэрміновыя выбары?

На красавіцкіх выбарах як "Лікуд", так і "Кахоль-лаван" заручыліся 35 дэпутацкімі мандатамі. Усяго ў ізраільскім парламенце 120 дэпутатаў.

Тады Біньямін Нетаньяху абвесціў пра перамогу, і на нейкі момант здавалася, што ў яго атрымаецца стварыць кіроўную кааліцыю пры дапамозе менш буйных правых і рэлігійных партый.

Але некалькі тыдняў перамоваў паміж партыямі не прывялі да выніку і Кнэсет самараспусціўся ў асноўным таму, што партыя "Наш дом Ізраіль", якая мяркуецца прадстаўніцай інтарэсаў расейскамоўных ізраільцянаў, адмовілася супрацоўнічаць з рэлігійнымі партыямі.

На першы погляд гэта здаецца вынікам сутыкненняў каштоўнасцяў рэлігійных і нерэлігійных партый, кажа карэспандэнт Том Бейтман з Ерусаліма.

Але ў Нетаньяху было ўсё менш магчымасцяў скласці кааліцыю, бо ягоныя палітычныя пазіцыі паслабленыя цэлым шэрагам абвінавачванняў у атрыманні хабару, махлярстве і злоўжыванні даверам. Сам Нетаньяху катэгарычна адмаўляе ўсе абвінавачванні.