22 кастрычнiка 2019, aўторак, 18:07
Мы ў адной лодцы
Рубрыкі

Звольненая і адноўленая настаўніца з Гомеля: «Вы бачыце на маім твары ўсмешку?»

40
Звольненая і адноўленая настаўніца з Гомеля: «Вы бачыце на маім твары ўсмешку?»
ЛЮДМІЛА ІВАНАЎНА
ФОТА: ПАВЕЛ МІЦКЕВІЧ

Супрацоўнікі школы і бацькі ў шоку ад пастановаў Лукашэнкі.

Чацвер 19 верасня стаў у самай вядомай школе Гомеля не менш напружаным днём, чым бурны тыдзень да таго. Нагадаем, пасля скандалу з відэа настаўніцы, у справу ўмяшаўся Лукашэнка. Пастановы былі жорсткімі і шматузроўневымі: настаўніцу аднавілі на пасадзе, высокія чыноўнікі атрымалі вымовы, а дырэктарку школы – звольнілі з пераводам на іншую працу, піша kp.by.

У школу нумар 15 журналістаў не пускаюць. А 8-й раніцы 19 верасня дырэктаркі Марыны Чарненкі (ужо былой) у ёй яшчэ не было. Супрацоўнікі на адзін голас сказалі, што пастанова пра звальненне Марыны Уладзіміраўны для іх была шокам, яны прачыталі яе ўвечары ў сераду ў навінах. Чакаюць яе прыходу, пра новага дырэктара гаворка пакуль не ідзе.

А вось звольненая і адноўленая настаўніца Людміла Іванаўна была на месцы. Яна выйшла да вахты і выглядала пахмурнай, негаваркой. Сказала, што каментароў ад яе пакуль не будзе, таму што ёй трэба падрыхтаваць клас і правесці ўрокі. Нагадаем, яна вядзе ўрокі ў 2 класе, а ў той дзень выходзіла на замену.

ВУЧНІ ЗРАНКУ ІДУЦЬ У ШКОЛУ.
ФОТА: ПАВЕЛ МІЦКЕВІЧ

На пытанні, як яе настрой пасля ўсіх навінаў Людміла Іванаўна стомлена правяла далонню па твары і спытала: «Вы што, бачыце на маім твары ўсмешку?..» І пайшла ў клас.

Дырэктарка на ўваходзе так і не з'явілася – як апынулася, зайшла з другога ўваходу. І бацькі, і педагогі вельмі добра пра яе адгукаліся: «Два гады на пасадзе. Яна тут практычна жыве, у гэтай школе! Сама яе скончыла, потым адвучылася, вярнулася, была настаўніцай пачатковых класаў, стала дырэктаркай... Мы ўсе за яе, вельмі шкада яе. Пастанова пра яе звальненне – гэта несправядліва».

Паразмаўляла з журналістамі толькі завуч. Яна сказала што ўсе на месцы, усе працуюць у штатным рэжыме, афіцыйных загадаў у іх пакуль не было.

Да 9-й раніцы ў школу прыбыў намеснік старшыні гомельскага гарвыканкама Віталь Атаманчук. Ён сказаў, што прыехаў выконваць пастанову прэзідэнта – гэта значыць аднаўляць на пасадзе настаўніцу і звальняць дырэктарку. Яшчэ будзе развязвацца пытанне, як яе будуць звальняць, ці будзе яна пісаць заяву і на якую працу яе перавядуць. Ён папрасіў таксама не непакоіць цяпер дырэктарку. Уздыхнуўшы, сказаў, што яна плача.

ЧЫНОЎНІКІ З ГАРВЫКАНКАМА ПРЫЙШЛІ ВЫКОНВАЦЬ ПАСТАНОВУ ПРЭЗІДЭНТА.
ФОТА: ПАВЕЛ МІЦКЕВІЧ