Шамана, які ішоў выганяць Пуціна, пасадзілі пад падпіску аб нявыездзе
13- 21.09.2019, 13:35
- 14,963
Якут моцна напалохаў улады РФ.
У Расеі суд выбраў захад стрымання ў выглядзе падпіскі аб нявыездзе якуцкаму шаману Аляксандру Габышаву, які ішоў у Маскву, каб "выгнаць Пуціна". Пра гэта паведамляе "Інтэрфакс" са спасылкай на афіцыйны дакумент.
Прыхільнік Габышава апавёў, што ў ноч на 19 верасня шамана павезлі "супрацоўнікі спецслужбаў". Гэта адбылося на мяжы Бураціі і Іркуцкай вобласці.
Пасля гэтага прэс-служба Міністэрства аховы здароўя Якуціі паведаміла, што шамана змясцілі ў псіхіятрычную лякарню ў Якуцку.
Аднак адвакат праваабарончай арганізацыі "Праваабарона Паштоўкі", які спрабаваў наведаць шамана ў лякарні, сказаў, што там яго няма, пісала агенцтва "Інтэрфакс".
У дакуменце, на які спасылаецца агенцтва, гаворыцца, што ў дачыненні да Габышава распачалі крымінальную справу аб публічных закліках да экстрэмізму. З 13-га да 20 верасня шаман знаходзіўся ў вышуку, а 20 верасня яго даставілі да следчага.
Псіхолага-лінгвістычнае даследаванне паказала, што ў выказваннях Габышава ўтрымліваецца публічны заклік да гвалтоўных дзеянняў у дачыненні да прэзідэнта РФ, адзначае агенцтва.
Габышаў шэсць месяцаў ішоў уздоўж далёкаўсходніх трасаў у бок Масквы, адкуль у 2021 годзе мае намер "выгнаць" Пуціна. Ён мяркуе, што прэзідэнт Расеі – спараджэнне цёмных сілаў, з якім пад сілу справіцца толькі шаману.
Шаман выказваў меркаванне, што ў Расеі павінна быць народаўладдзе. Ён казаў, што мае намер ініцыяваць "народныя паўстанні" ў краіне.