Мікалай Карпюк: Генерал ФСБ казаў мне, што РФ хацела захапіць поўдзень Украіны, але вы гэта не дапусцілі

Нядаўні ўкраінскі палітвязень распавёў пра размовы з генерал-лейтэнантам ФСБ.

У момант пачатку агрэсіі супраць Украіны Расея планавала захапіць увесь поўдзень краіны, і адзінае, што перашкодзіла акупантам - адзінства ўкраінцаў. Пра гэта ў аэрапорце Барыспаль заявіў нядаўні палітвязень Мікалай Карпюк, паведамляе inforesist.org.

«Уявіце сабе. Генерал-лейтэнант ФСБ упершыню мне гэтыя словы сказаў у красавіку 2014 года, а потым тройчы мне паўтараў: «Мікалай, вы думаеце нам Данбас патрэбны. Навошта ён нам патрэбны, туды ж нямерана грошай трэба ўкласці. Нам патрэбны поўдзень Украіны, Адэса, Нікалаеў, Херсон і наогул мы забіраем у вас левабярэжную Украіну. Вось толькі да гэтага часу не вырашылі, Кіеў забраць сабе або аддаць Захаду. А гэта хай захад забірае, няхай палякі забіраюць», - сказаў Карпюк.

Мужчына настойвае, што прадстаўнік краіны-агрэсара быў шчыры, а не «гнаў панты», паўтораны гэты тэзіс быў тройчы.

«Гэта быў рэальны план, я бачыў па ягоных вачах. Гэта быў рэальны план, але чаму ён не атрымаўся. Яны разлічвалі на развал Украіны. Вы гэтага не дапусцілі. Адзіная зброя, якую супрацьпаставілі гэта ваша адзінства. І калі мы будзем і далей праяўляць адзінства і салідарнасць - нічога ў іх не атрымаецца, а ў нас усё атрымаецца», - рэзюмаваў Карпюк.