Маскву рассмяшыць «нафтавая» пагроза Менска

У беларускіх уладаў няма аргументаў, каб прымусіць Крэмль вярнуць ранейшыя нізкія цэны на энэрганосьбіты.

На нарадзе з кіраўніцтвам Савета Міністраў 14 студзеня Аляксандр Лукашэнка палічыў за лепшае прамаўчаць пра перамовы з Расеяй. Мабыць, да сказанага на мінулым тыдні пра цэны на нафту («Аргументы мае простыя. 75 гадоў Вялікай Перамогі») дадаць яму не было чаго.

Аддзімацца за кіраўніка дзяржавы перад журналістамі давялося першаму віцэ-прэм'еру Дзмітрыю Крутому. Ён пацвердзіў, што беларускія ўлады пакуль працягваюць намагаць на сваім, і не маюць намеру плаціць прэмію расейскім нафтавым кампаніям - праз што айчынныя НПЗ працягваюць працаваць амаль на халастым хаду, піша «Салідарнасць».

Віцэ-прэм'ер спрабаваў быць аптымістычным, але агучаны ім довад, які павінен прымусіць пайсці Маскву на саступкі, атрымаўся ўжо вельмі непераканаўчым.

- Думаю, што ад беларускага рынку ў любым выпадку адмахнуцца проста так вельмі складана: мы з'яўляемся буйным спажыўцом расейскай нафты (прыкладна 10% расейскага экспарту), - заявіў Дзмітрый Круты.

- Але калі канфлікт зацягнецца, расейскія нафтавыя кампаніі перакінуць гэтую нафту на рынкі, дзе плацяць па сусветных цэнах. Яшчэ і іх бюджэт атрымае экспартныя мыты, якія не атрымлівае, калі нафта ідзе ў Беларусь, - парыраваў палітычны аглядальнік Арцём Шрайбман.

Яшчэ больш недарэчна прагучалі словы віцэ-прэм'ера пра пошук альтэрнатыўных крыніц нафты. Трэба меркаваць, беларускія ўлады падаюць гэтую інфармацыю ў перамовах з расейскім кіраўніцтвам як нейкую пагрозу.

- Мы разаслалі адпаведныя камерцыйныя прапановы. Усе камерцыйныя службы нашых заводаў, Беларускай нафтавай кампаніі знаходзяцца на перамовах практычна ў штодзённым рэжыме. Думаю, тут мы таксама хутка атрымаем альтэрнатыўныя варыянты пастаўкі канкрэтнай нафты. Усе магчымыя краіны: і Украіна, і Польшча, і краіны Балтыі, і Казахстан, Азербайджан. Мы зараз заняліся гэтым пытаннем, - заявіў Дзмітрый Круты.

Гэта перасцярога напэўна рассмяшыць чыноўнікаў у Маскве. І сваім перыядам часу (шмат гадоў не маглі ці не хацелі знайсці альтэрнатыву, а тут раптам па пстрычцы пальцаў знойдуць?), і адсутнасцю хоць бы мінімальнай канкрэтыкі і прапрацоўкі.

Пасля слоў беларускага віцэ-прэм'ера прадстаўнік Дзяржаўнай нафтавай кампаніі Азербайджана (SOCAR) Ібрагім Ахмедаў заявіў РИА НОВОСТИ: «Перамовы на гэты конт вяліся, у прынцыпе мы гатовыя, можам паставіць, як і раней. У нас ёсць, як вы ведаеце, нафта Аzeri-light. Але нічога канкрэтнага пакуль на гэты конт няма».

Пра немагчымасць пастаўляць нафту ў Беларусь заявіла прэс-служба польскага аператара нафтаправода «Дружба».

І як жа неаднаразова адзначалася экспэртамі: праз пытанні лагістыкі наўрад ці беларускія ўлады змогуць знайсці нафту таннейшую за расейскую - нават з улікам таго, што яе кошт працягвае паступова набліжацца да сусветнага.

У аўторак «Коммерсантъ» адзначыў: «Пакуль незразумела, на што менавіта разлічвае беларускі дыктатар Аляксандр Лукашэнка, займаючы жорсткую пазіцыю ў пытанні паставак нафты».

Пасля выступу віцэ-прэм'ера Дзмітрыя Крутога можна зрабіць выснову, што гэтага не разумеюць і ў беларускім урадзе. Тым часам Беларусь рызыкуе страціць велічэзную долю экспарту, не пастаўляючы нафтапрадукты за мяжу.